India group awmna a fuh

Nimin khan FIFA World Cup 2026 Preliminary Joint Qualification Round 2 draw chu Kuala Lumpur, Malaysia-ah neih a ni a, India chu group A-ah Qatar leh Kuwait te nen an awm ho.

Group A-ah hian round 1-a Afghanistan leh Mongolia te inkhela chak zawk an awm bawk dawn. Group khat aṭangin team hnihin round 3 an lut dawn a, hei vang hian India tan pawh beisei a sang hle.

Qatar hi FIFA ranking-ah 59-na an ni a, India tan elphak an harsa ang. Chutihrualin team dang Kuwait (137), Afghanistan (157) leh Mongolia (183) te hi chu India (99) aiin ranking-ah an hniam vek.

November 16, 2023 hian India-in match hmasa berah Kuwait an hmachhawn dawn a, inkhel pawimawh a ni ang. Igor Stimac-a hote hian match 11 chhung hneh loh an tawng tawh lo.

Blue Tigers hian Tri-Nation Cup, Intercontinental Cup leh SAFF Championship-ah te an champion a, Mizo tlangval Lallianzuala Chhangte chuan hmun pawimawh a chang. Indian Super League-a Mizo player-te chet ṭhat dan a zirin India team-ah Mizo tam zawk an tel thei ang.