Azarenka leh Gauff tlak niah Halep chak

French Open hmeichhe singles champion tur rinthiam a harsa. Hliam vanga Serena Williams a inhnuhdawh hnu lawkah Victoria Azarenka leh Coco Gauff an tla a, clay court season hmang ṭha tak Simona Halep erawhin third round a lut thung.

Belarus star, tun thlatir lawka US Open lut thei Azarenka hi clay court-ah chuan player hlauhawm a ni rih lo - player langsar pawh ni lo Slovak Schmiedlova lakah 6-2, 6-2 a chak loin a zinkawng a tawp.

Kum 26 mi Schmiedlova hi nikum khan a khup hliam zai a ni a, hun rei tak chhung a inkhelh mumal theih loh hnua rawn kir leh a ni. A match hmasa zawkah Venus Williams a hneh tawh bawk a, third round-ah Nadia Podoroska nen an inkhel leh ang.

American tleirawl, kum 16 mi chauh ni chunga tennis khawvel barakhaih thei Gauff pawhin a tum ram a thleng zo lo. French Open a khelh hmasak berah hian tihsual a ngah a, world number 159 Martina Trevisan lakah 4-6, 6-2, 7-5 in a chak lo.

Gauff hian Australian Open, Wimbledon leh US Open a khelh hmasak berah chuan third round a thleng phak vek. Roland Garros-ah erawh American player dangte ang bawkin beisei a phak lo chho dawn niin a lang.

Player langsar dang an chak loh laiin Halep erawh a dingnghet. Romanian star hian Irina Camelia Begu 6-3, 6-4 in a hneh. 2018 Roland Garros champion hian kumin US Open hnu lama match a khelh tawh hoah chak loh a la nei lo, tun ṭumah pawh hian rinkai ber a ni.

Kum 29 mi Halep hian kar hmasa khan Italian Open nomawi a chawi a, French Open-ah hian world number 1 Ashleigh Barty a inlan loh avangin seeded pakhatna pek a ni; zanin hian Amanda Anisimova nen an inkhel leh ang.