TNT leh Volleyball

Thutak Nunpuitu Team (TNT) hi fahrah leh ruihhlo ngai mai bakah vohbikte enkawlna hmun a ni a, enkawl ngai mi tam tak bakah thawktu ṭhahnem tak an awm bawk, an zingah hian Volleyball vanga Muanna Veng pan pawh an awm!

TNT Volleyball team assistant coach, an sports in-charge ni bawk Lalzawmliana chuan, "Kan hotupa Pu Sangthankima hian a vanglai chuan volleyball a khel nasa a, a vanglaia team ṭha PHE Department tan captain hial a ni phak.

"Rawngbawl hna a thawhna hmunah pawh volleyball hi a chhawm tel zel a, kum 1996 thleng kha chuan ṭha takin min khelhpui a, kum 1998 thleng khan nasa vak lo chuan a khel, a hnu lamah erawh a kum a tam ve tawhin a hriselnain a tlin ta bik lo," tiin Vanglaini a hrilh.

TNT hian kum 2000 khan volleyball team pangngai an din a, kum 2001 aṭang phei chuan changtlung zawka kalin tun thlengin an la chawl lo. Sangthankima nau Lalmawizuala chuan National Institute of Sports, Patiala-ah coaching a zir chhuak a, ani hian midang a zirtir chhawng ve leh a ni.

Vanglaini zawhna chhangin Zawma chuan, "Volleyball hi kan ngaipawimawh a, kum 2001 aṭanga 2008 chhung phei kha chuan hlawhtlinna pawh kan chang hnem hle, a hnu lamah zuih ve deuh lai nei mah ila tun hnaiah kan rawn tho chhuak.

"Mak deuh mai chu, TNT-ah hian volleyball vanga rawn lut pawh an awm. Chung mite chuan a hnu lamah thlarau lama chhandamna chang ta sawi tur pawh an awm a, sipai ṭan phah ta te pawh an awm bawk," tiin an tana volleyball hlutna a sawi.