Man United lakah Real Madrid an chungnung
Khawvela football club hlawhtling pahnih Real Madrid leh Manchester United ten nimin zing khan Texas-ah friendly match an khel a, Spanish club lian Los Blancos 2-0 in an chak.
Real tan hian Borussia Dortmund aṭanga an lakluh Jude Bellingham-a'n minute rukna lekah a pet goal a, Espanyol aṭanga Santiago Bernabeu pantu Joselu pawhin hun tawp hma hretin goal mawi bik a khung bawk.
Manchester United hian United States an chhuahsan hmain July 31, Thawhṭanni zing dar 6:30-ah Borussia Dortmund an hmachhawn ang. Carlo Ancelotti hote hian Barcelona leh Juventus an la hmachhawn dawn thung.
Goal ṭha pahnih
Inkhel an ṭan chauh a, minute rukna lek a ni nachungin Real lamin United tlarhnung lai taka hmun awl an hmu fuh. Antonio Rudiger chuan mual laiah ball a chang a, Germany international defender thil tum hre thiamin Bellingham a tlan lut.
United right back Aaron Wan-Bissaka-a'n offside trap a siam sual a, Bellingham-a'n a hun thawl neih chu thiam taka hmangin keeper Andre Onana tlan chhuak chu cool zetin a pet khum. Pound maktaduai 88.5 man Bellingham hian ball vawi hnih chauh a khawih a, Real player thar hian a theihna sanzia a pholang.
Real-in Benzema an chhuahtir a, loan-in kum 33 mi Joselu an lalut. Los Blancos thutlukna hi a mak viauin a lang a, mah se United nena an friendly match bik aṭanga teh chuan thutlukna dik an siam.
Second half-a lut Joselu hian Onana tan hna a siamsak a, minute 89-naah dinglam aṭanga Lucas Vazquez cross chu a back volley goal. United keeper Onana-a'n an en goal a, chet hman a ni lo.
United lam hi
Onana chuan United tana a match hmasa ber a khel a, hma takah goal a chhuah a, hun tawp dawnah goal a chhuah leh bawk. David de Gea thlaktu Onana hi goal luh danah dem theih a ni lo a, dan ṭhat ṭum hnih thum vel a nei.
Chutihrualin Onana ball sem thiamzia hmuhin a awm a, a ke aṭangin ball chhuak a tam a, defender lamin keeper hi ball an pe hnem bawk. Ten Hag-a'n De Gea a chelh loh chhana ngaih chu ball sem a thiam tawk loh vang a ni a, a thlakna tura lak Onana erawhin ball sem a thiam chiang e.
United tana chanchin lawmawm lo chu minute lina lekah hliam vangin Kobbie Mainoo lakchhuah a ni. Casemiro-a'n Rodrygo a titlu a, Brazilian forward hian Mainoo a delh. Ten Hag-a'n Mainoo inhliam chen tur a la hre thei lo, chutihrualin chance pek zel a tum thu a sawi thung.
Real lakah United-in goal chhuah mah se goal chance an nei ve tho a; Marcus Rashford, Alejandro Garnacho leh Antony ten hun ṭha an bawhpelh. Ten Hag chuan, "Arsenal kan khelh ṭum aiin pressure kan pe ṭha lo zawk a, hemi kawngah hian hma kan sawi thei. Goal khung kawngah pawh hmasawn kan ngai," tiin a sawi.
Man United hian an mamawh bera an ngaih no. 9 an la lalut thei lo a, tunah hian Atalanta nen Rasmus Hojlund chungchangah an indawr mek.
Real lam hi
Real Madrid manager Carlo Ancelotti chuan, "Kan khel ṭha a, a bikin first half-ah kan khel ṭha zual. Thahrui kan nei a, theihna kan nei sang zawk. Squad ṭha tak kan nei a, kan player tharte hian min tih ṭhat belh bawk," tiin a sawi.
Italian manager hian a player-te fak zuiin, "Team chhungah tumah hnawksakin an awm lo a, dressing room-ah player enkawl an awlsam. Team boruak a ṭha a, kan phur a, pre season ṭha tak kan hmang," a ti.
Real hian tlarhmaah Rodrygo leh Vinicius Junior te an dah a, Bellingham-a'n Brazilian duo te hi a thlawp. Midfield-ah Luka Modric kiangah Aurelien Tchouameni leh Eduardo Camavinga te an awm thei bawk.
Bench aṭangin Toni Kroos, Federico Valverde leh Brahim Díaz te an la lut thei a; kum 23 mi Diaz hian loan-in season thum chhung AC Milan tan a khel a, Italian club-ah hmun pawimawh a chang pha.
Real hi Kylian Mbappe nena sawizawm an la ni reng bawk a, tun nipui bazarah Mbappe hi an lalut lo a nih pawhin nakkum lamah chuan an lakluh ngei a rinawm. Real Madrid hmalam hun hi a la êng hle.