Harsa takin Rublev a chak

Hamburg European Open khelh laiah Andrey Rublev chu a match hmasa berah a chak hram. Russian tlangval hian Bernabe Zapata Miralles lakah match point vawi thum a inchhanhim hnuin a chak hram.

Set hnuhnung bera tie break an khelh laiin Rublev hi 4-6 in a hniam zawk, mahse darkar hnih leh minute 53 an inkhelh hnuah 5-7, 6-1, 7-6 (7) in a chak.

Wimbledon khelh zawh takah khan Rublev hian quarterfinal-ah Novak Djokovic a ngam lo, a hnu lamah erawh a zawnin match nga a chak ta, kar hmasa khan Bastad title a lo la tawh bawk a ni, a match lehpekah Daniel Altmaier a tum ang.

Inkhel dangah seeded pakhatna Casper Ruud chuan Sebastian Baez chu 6-3, 1-6, 6-3 in a hneh a, ani hian second round-ah chuan Cristian Garin a tum ve leh thung dawn a ni.

Alexander Zverev pawhin amah ang bawka German player Maximilian Marterer lakah 6-3, 7-5 in hnehna a chang a, champion lai Lorenzo Musetti leh Jozef Kovalik te erawh an inkhel zo hman lo.

Set khatnaah Kovalik hi 6-3 in a chungnung, set hnihnaah erawh seeded pathumna Musetti-a'n 4-1 a hma a hruai laiin ruah sur vangin an khel chhunzawm thei ta rih lo, nizan khan khelh chhunzawm niin result kan hre hman lo a ni.