Season thar tawpah Djokovic chawl mai thei!

Novak Djokovic-a pa Srdjan Djokovic chuan a fapa in tennis a chawlhsan har tawh loa a rin thu a sawi a, a rin dan chuan tun aṭanga kum khat leh a chanve a liam leh chuan a chawlh a ring.

Serbian star hian Grand Slam nomawi 23 a chawi tawh a, tennis inelna lian bik major tournament an tih chinah ani aia champion hnem an awm lo - amah hnaih bertu Rafael Nadal (22 titles) pawhin season tharah chawlh a tum.

Srdjan Djokovic chuan, "Ka tehna aṭanga chuan kum sarih liamta vel khan a hna thawh tur chin a hlen chhuak tawh, a hnu lama a tawn zawng zawng hi chu a belhchhahna mai chauh a ni tawh.

"Tennis hi a hmangaihin a ngainat ber a ni a, chutihrualin a nun zawng zawng erawh a ni bik lo. Inkhelh a chawlhsan huna a tih tur pawh a ngaihtuah tel a ngai, ka beisei dan chuan nakkumah a chawlh ka ring," a ti.

Tun dinhmunah Djokovic hi kum 36 mi a ni a, infiamna huangah chuan a hun hnuhnung lam a ni tawh. A pa Srdjan-a'n chawl thuai turin duh tawh mah se, a nu Dijana erawhin a duh chen chen khel mah se pawi a tih loh thu a sawi ve thung.