Premier League Summer Series : Chelsea leh Newcastle an inhnehtawk

28th July, 2023

Nimin zing khan Atlanta-ah Premier League club lian pahnih Chelsea leh Newcastle United an inkhel a, 1-1 in an inhnehtawk. Blues tan player thar Nicolas Jackson che ṭha chhunzawmin goal hmahruai a khung a, Magpies tan Miguel Almiron-a'n first half injury time-ah siphurh a sut.

Premier League Summer Series hi Premier League club paruk inelna a ni a, chutihrualin friendly match a nih avangin club-ten chak ngawr ngawr aiin season thara team ṭha din tumin hma an la tih hriat a ṭha.

Chelsea manager Mauricio Pochettino chuan, "Tun dinhmunah chuan boruak a ṭha a, player-te pawh an nungchang a ṭha a, an inkawmngeih bawk. Mahse, match tinah player ṭha pali panga awltir an ngai reng a, hei hian pressure a tam phah," tiin a sawi.

Season liam ta khan Blues hian player lak nan pound maktaduai 600 chuang an hmang a, London club hian palyer an chhuahtir nual tawh nachungin mamawh aia tam player an la kawl. Argentine manager Pochettino chuan, "Squad lian uchuak kan neih a rem lo. Player kan ngah lutuk chuan buaina a awm dawn. Player 22-24 vel kan mamawh a, hetah hian player naupang zawk an tel a ngai bawk. Hei hian team chhunga inelna boruak pawh a ti ṭha ang," tiin mamawh aia tam player a kawl thu a sawi.

Chelsea hi season liam ta khan 12-na an ni chauh a, match 38-ah point 44 chauh an hmu. Player an ngah avanga team boruak ṭhat loh thu hi defender pahnih Marc Cucurella leh Reece James te pawhin an sawi chhuak.

Pochettino chuan, "Season thara kan bula awm tur chu an hlim a ngai. Starting XI beisei kha bench-a an awm chuan an hlim thei dawn lo. Chelsea-in player thlang turin min la a, chuvangin an rilru put hmang hi an sawi chian a ngai. Player rilru put hmang dik nei kan mamawh a ni," tiin player ṭhenkhat chhuahtir a la duh thu a sawi.

Chelsea-in match hnuhnung berah Fulham an hmachhawn dawn a, an hneh chuan champion thei an la ni. Newcastle erawh an match hnuhnung berah Brighton an hmachawn dawn a, chak loh la nei lo mah se chak an neih chuang loh avangin champion a harsa tawh ang.