Brighton tan Adingra

Brighton & Hove Albion-in Premier League Summer Series-ah Chelsea an hneh loh hnuah nimin zing khan Brentford 2-0 in an hneh a, goal hnih hi Simon Adingra khung ve ve a ni.

Ivory Coast winger Adingra hian season liam ta khan Belgian club Union SG tan a khel a, league match 32-ah goal 10 a khung. Kum 21 mi Adingra hian minute 19-naah keeper ball pet chhuah chu la thlain goal-ah a pet nghal a, goal ṭha a ni.

Adingra hian minute 58-naah mual veilam aṭanga ball lalutin ṭha zetin a pet goal leh a, pre season-a a chet ṭhat hi inelna takah a chhunzawm thei a nih chuan Premier League-ah hming a chher thei ang.

Chelsea nena sawizawm Moises Caicedo pawh hun tawp lam minute 25 a rawn khel a, Brighton midfielder hi tun pre season-a a inlan hmasak ber a ni.