Calvert-Lewin-a'n hattrick a siam

Everton-in League Cup quarterfinal lut turin West Ham United 4-1 in an hneh a, Dominic Calvert-Lewin-a'n tun season-a a vawi hnih nan hattrick a siam. Carlo Ancelotti hote hi Premier League lamah pawh match thum an khelh tawhah an la chak vek a, 'big six' zinga chhiar ni lo mah se season tawpah a sang paruk zinga awm thei an ni.

Goodison Park-a inkhelah Calvert-Lewin hian minute 11-na lekah Michael Keane-a pass chu goal-ah a chantir a, West Ham-in Robert Snodgrass hmangin minute 46-naah an sut. Toffees-in Richarlison hmangin minute 56-naah hma an hruai leh a, Calvert-Lewin-a'n minute 78 leh 84-naah a khung leh bawk.

Kum 23 mi Calvert-Lewin hi Sheffield United aṭanga inzir chhuak a ni a, loan hmangin Stalybridge Celtic leh Northampton Town ah te a kal tawh. August 2016 khan Everton-in pound maktaduai 1.5 lekin an lalut a, tun season-ah Premier League striker langsar zingah a tel.

Premier League match thum khelh tawhah Calvert-Lewin-a'n goal a la khung vek a, West Brom lamah hattrick siamin Crystal Palace leh Tottenham lakah goal khat ve ve a khung. English striker hian League Cup-a a hattrick siam nen tun season-ah goal riat a khung der tawh a, hmabak a nei êng hle. 

Everton manager Carlo Ancelotti chuan, "Calvert-Lewin hi English striker ṭha ber a ni em tih chu chhang thei lo mah ila, Everton striker ṭha ber a ni tih chu ka chiang. Hna ṭha tak a thawk a, a vanglai hun a chen mek a ni," tiin a fak.