David Silva-a'n football chawlhsan ta

Manchester City captain hlui, hlawhtlinna tam tak an chan theih nana sulsutu pawimawh David Silva chuan football a chawlhsan ta. Spanish midfielder hian inkhelh la duh mah se, a khup hliam vangin a duh aia hmain boot a khai a ngai ta zawk a ni.

Kum 37 mi Silva hian Citizens tana a vanglai a hman zawh hnuin Real Sociedad-ah a kir. La Liga club tan hian season thar inbuatsaihna an nei a, mahse vanduaithlak takin training an neih laiin a khup vei lam a hliam a, loh theih lohna vangin a chawlh a ngai.

Pep Guardiola chuan, "Hmun chep leh zim taka han che vel tur chuan, ani aia ṭha hi ka la hmu ngai lo," tiin David Silva chungchang a lo sawi tawh a nih kha, thluak fim tak hmanga football khel ṭhin a nihna kha khawvel chuan a hre reng tawh ang.

Mangṭha

July 27, Ningani zan khan Silva hian social media kaltlangin football a chawlhsan thu hi a puang a, twitter lamah video tawi dah chhuakin thu tam a sawi lo, "Ka tan chuan vawiin hi ni lungchhiat thlak tak a ni.

"Ka nun puma ka buaipui leh rilru zawng zawng ka pekna chu ka mangṭha a ngai ta. Ka inkhelh puite hi ka tan chuan ka chhungte ang an ni a, ka mangṭha a ngai ta si, ka ngai thei ngawt ang che u," tiin a sawi chhuak.

Mizo zaithiam Vanrammawia'n thiam tak mai a, kan nun hluite an dawn kir ve ang a, an lung a leng ve ngei ang, tia a lo sak vawng vawng ang khan Silva pawh hian a takin a hriatthiampui ngei ang tih a chiang.

City Legend

Player tam takin football an khel a, club tana mi hlu tak tak an ni hlawm. Mahse, mi tlemte chauh mi bik an awm a, an hnathawh ropui leh sulhnu ṭhate avangin chawimawi an hlawh ṭhin - Man City khelmual Etihad Stadium kawtah Silva-a lim (statue) an dah.

Etihad Stadium kiangah hian Vincent Kompany leh Sergio Aguero te lim pawh dah a ni, an tam lo asin! Man City tana Premier League nomawi vawi li chawi thei a ni satliah lo a, team an indinthar chhoh laia mi pawimawh leh sulsutu zinga mi a ni.

Manchester City chuan an legend thlahna thuchhuah siamin, "I football zinkawng kha a ngaihnawmin a duhawm chungchuang asin, hringnun i hman zelna turah duhsakna sang ber kan hlan a che - El Mago!" tiin an thlah.

Spain Legend

David Silva hian Valencia aṭangin bul a rawn ṭan a, chumi hnuah Manchester City a pan. A vanglai hian Barcelona leh Real Madrid te chuan Spanish player ṭha an kawl khawm deuh vek - Catalan club hian an kawl hnem zual lai a ni.

Spain team chu Barcelona leh Real Madrid player hlang deuhthawin an khel ṭhin, mahse hetiang karah hian Man City midfielder Silva tan hian hmun a awm ve zel, an ram tan hian match 125 ngawt khelin goal 35 a khungsak.

Spain national team chuan, "I thil tih zawng zawngte avangin lawmthu kan sawi, i thil mak tihte hi engtikah mah theihnghilh a ni tawh ngai lo ang," an ti. La Roja hi World Cup 2010 bakah Euro 2008 leh 2012 te khan a champion pui a ni.