Sadio Mane-a'n Al Nassr a pan hnai

Bayern Munich-a tla tlum lo Sadio Mane pawhin Saudi Arabia lam a hawi. Mane chungchangah hian Bayern Munich leh Al Nassr an indawr a, Saudi club hian euro maktaduai 37 vela leichhuah theih an inbeisei. He thu i chhiar meuh chuan inrem hial thei bawk.

Kar liam ta khan Mane-a'n Saudi pan a hreh loh thu a tichiang a, a agent Bjorn Bezemer pawhin tunkar hian Japan a tlawh dawn. Bayern Munich hian Asia ramah tour an nei mek a, Tokyo-ah Manchester City nen friendly match an neih hnuin vawiin tlai dar 3:30 hian Kawasaki Frontale nen Japan National Stadium-ah an inkhel leh ang.

Nikum June thla khan Mane hian Liverpool aṭangin pound maktaduai 35-in Bayern Munich a zawm. Bavarians hian euro maktaduai 32 (£27.4m) hi a pe tla nghal a, euro maktaduai ruk chu a khelh tam dan a zira pek tur niin euro maktaduai thum dang erawh mimal leh team hlawhtlinna a zira pek leh tur a ni.

Senegalese forward hian German club-ah beiseina sang tak nei mah se Bayern-ah Liverpool-a a chet ṭhat a chhawm lo. Reds tana match 269-a goal 120 zet khungtu Mane hian season liam ta khan inelna hrang hrang match 38-ah goal 12 chauh a khung.

Mane hian Champions League-a Man City an hneh loh zawhah a teammate Leroy Sane chu dressing room-ah a hnek a, Sane hi a hmui a vung hial. Bayern-in Mane hi match khat atan an hrem zui bakah pawisa an chawitir bawk.

Julian Nagelsmann chhuah hnuah Thomas Tuchel Bavarians a enkawl a, manager pahnih hnuaiah Mane hi a tla tlum lo ve ve. Bayern-a a khelhpuite pawhin Mane hi an en hrang nia sawi a awm a, hei vang hian Liverpool forward hlui tan Allianz Arena chhuahsan hi atana ṭha ber a ni.