Man City khingpui tur Atletico

Manchester City chuan July 30, Pathianni tlai dar 4:30 hian Seoul World Cup Stadium-ah Atletico Madrid an hmachhawn dawn. Inkhel hi Fancode hmangin a en theih ang.

Pep Guardiola hote hian pre season-ah Yokohama F. Marinos leh Bayern Munich an hmachhawn tawh a, an la hneh ve ve.

Premier League champion hian Seoul-ah hian chhuak thei tura an sawi Kyle Walker an la hruai a, City hian England international defender hi chelh an tum hle.

Man City hian RB Leipzig aṭangin Josko Gvardiol an la beisei reng a, German club hian August 12-a Bayern Munich nen Super Cup an khelh hmain tihfel hman an duh.

Chutihrualin, Pep Guardiola hmachhawp lian ber erawh season thara a player-te inpeihtir hman a ni ang. City hian Atletico an hmachhawn zawh hian Arsenal nen August 5, Pathianni zan hian Community Shield inchuhin Wembley Stadium-ah an inhmachhawn ang.