Hojlund: United vs PSG

Manchester United hel lai Rasmus Hojlund chu Paris St-Germain-in an chuhpui a, French club hian Danish striker lei nan euro maktaduai 50 (£42.8m) an thehchhuak.

PSG hian Hojlund an duh tih lantir mah se Atalanta phalna zat a ni pha lo. French champion hian Serie A club hian an chhiar uchuak hreta ngaiin an dawr chhunzawm a rinawm loh.

Man United pawhin Nilaini khan a thuphungin euro maktaduai 50 bakah a chet ṭhat dan a zirin euro maktaduai 10 pek belh an huam thu Atalanta hi an hriattir tawh. Italian club hian euro maktaduai 70 bawr vel an beisei thung.

Hojlund hian nikum nipui bazarah Austrian club Sturm Graz aṭangin Atalanta hi a zawm a, Serie A match 31 khelin goal riat a khung bakah assist vawi hnih a nei bawk.

Season khata goal riat hi a tam hran lo a, chutihrualin Hojlund erawh kum 20 mi chauh a nih avangin Atalanta-in a man atana sum an phut hnem hi a mak hran lo.

Manchester United hian no. 9 an la nei lo a, Real Madrid nen friendly match-a goal an khung loh avangin Erik ten Hag-a'n Hojlund emaw striker dang emaw a mamawhzia a hrechiang. Hei vang hian nipui bazarah United-in striker lak tumin an bei nasa lehzual ang.

Ten Hag-a hote hian July 31, Thawhṭanni zing hian Borussia Dortmund nen friendly match an khel dawn a, striker thar an la neih dawn loh avangin Anthony Martial tan Dutch manager hmin theihna remchang a ni thei ang.