Chelsea lei dilna an hnawlsak

Brighton chuan Chelsea hnen aṭangin an midfielder Moises Caicedo lei dilna an dawng - Blues hian pound maktaduai 80 tehmeuh theh chhuak phal mah se an lei dilna hi hnawlsak an ni.

Kum 21 mi Caicedo hi thlasik bazar lai khan Arsenal pawhin sum tam tham takin an lo dawr tawh a, mahse an hlawhtling lo. Chelsea pawhin lak ngei an tum a nih chuan sum tam tham zawk an theh chhuah ngei a ngai dawn niin a lang.

Chelsea hian Brighton aṭangin defender Marc Cucurella chu pound maktaduai 60 zetin an lo lei tawh bawk, coach Roberto de Zerbi-a'n chelh a duh bawk avangin Caicedo lak hi a awlsam lo - Blues dilna hi vawi hnih an hnawl tawh a ni.

Ecuador international hian kumin Match thla khan Brighton tan hian contract a ziak thar a, an inremna hi kum 2027 thleng daih a ni. Tunah hian season thar inbuatsaihin New Jersey, United States lamah hun a hmang mek.