Quarterfinal-ah Swiatek a lut

Tennis inelna BNP Paribas Warsaw Open khelh laiah, world number 1 Iga Swiatek chuan a khingpui Claire Liu chu 6-2, 6-2 a hnehin quarterfinal a inhlangkai a, seeded pahnihna Karolina Muchova erawh a zinkawng a tawp thung.

Chinese nula Liu-i lakah Swiatek hian record a nei ṭha hle a, vawi li an intawn tawhah a chak fai vek - tun season kal laiah bikah pawh vawi thum ngawt a hneh tawh a ni.

Poland nula Swiatek hian semifinal lut tur chuan Linda Noskova a paltlang leh a ngai dawn, nizan khan an inkhel zui a, result erawh kan hre hman lo. Last 16 inkhel dangah Noskova hian Viktoria Hruncakova chu 6-3, 6-3 in a hneh ve thung.

Inkhel dangah seeded pahnihna Karolina Muchova chuan qualifying kaltlanga inlan Rebecca Sramkova chu 7-5, 3-6, 7-5 in a hneh lo. Set thumna bikah 5-1 ngawtin hma a hruai fal a, match point pawh vawi li lai hmu mah se a paltlang zo lo a ni.