Al Ettifaq-ah Henderson; Liverpool supporters’ board an lawm lo

Liverpool captain Jordan Henderson chuan Saudi Pro League club Al Ettifaq chu pound maktaduai 12 an pe fel a, kum thum daih contract a ziak. Khawthlang media te tarlan danin Henderson hian kar khatah £700,000 ($917,000) bawr vel a hlawh dawn a, tun dinhmuna Premier League player hlawh tam ber Kevin De Bruyne aiin kar khatah £300,000 velin a hlawh tam zawk dawn.

Henderson-a thutlukna avang hian Liverpool supporters board an thinur a, Saudi club a zawm hi pawi an ti hle. LFC supporters board hian Hendo hi khelmual chhung leh pawn entawntlak player-ah an ngai a, Saudi club laka an captain an chan hi hriatthiam harsa an ti a ni.

Klopp-a'n a ui

Jurgen Klopp-a'n kum 2015 khan Borussia Dortmund aṭangin Liverpool hi a zawm a, German manager hnuaia captain nghet awmchhun chu Hendo hi a ni. Klopp leh Hendo inkawp hian Liverpool chu an la champion ngai loh Premier League nomawi an chawipui a; Champions League, FIFA Club World Cup, FA Cup, League Cup, UEFA Super Cup leh Community Shield-ah te an champion vek.

Kum 56 mi Klopp chuan, "Hendo tan thutlukna harsa a ni dawn tih ka hria a, a thutlukna hi ka hriatthiampui. A thutlukna hian minti ngui a, mak ka ti. Helai hmuna ka rawn awm hnuah Hendo hi ka captain awmchhun a la ni. Chutihrualin ani tan chuan chona thar a ni dawn. Player a nihna ang leh mihring mihrinna ang pawhin kan ngai khawp ang," tiin captain a thlah.

Gerrard-a thluak

Saudi club Al Ettifaq-in July thla tir khan manager atan Steven Gerrard an lalut a, Liverpool captain hlui tan nikum October thlaa Aston Villa a chhuahsan hnua a hna chelh lehna hmasa ber a ni.

Liverpool legend Gerrard hian Anfield-ah Henderson hi a hrechiang tawh a, Al Ettifaq-a a luh theih nan pawh a thawh hlawk hle. Gerrard hian kum 2015 khan Anfield a chhuahsan a, Hendo hian kum 2011-ah Anfield panin season li an khel dun hman.

Hendo thiamna langsar vut ni lo mah se khelmualah hruaitu ṭha a ni a, hei hi Gerrard-a'n a hmuh hmaih lo. Liverpool-a hmun pawimawh chang pha Hendo hian Al Ettifaq-ah pawh hmun pawimawh a chang leh ang.

Rilru na

Kum 2022 khan Liverpool supporters' board din a ni a, member 16 an awm. Member zingah hian Paul Amann, Kop Outs chairperson leh Jo Goodall, chair of Liverpool’s women’s supporters club te pawh an tel.

Liverpool supporters' board chuan, "Jordan Henderson hi captain dik tak a ni a, khelmual pawn leh chhungah hruaitu ṭha a ni. Ngaihdan nghet nei footballer a ni a, chuvangin tuna a thutlukna hian kan rilru a ti na hle.

"Liverpool supporters' board chuan mi tupawh mipa emaw hmeichhia emaw rinna eng mi pawh a ni emaw pian phunga rualbanlo pawh ni se nuam ti takin football a thlir thei tur a ni, tih hi fan tana kan duh a ni a, football atana kan duh pawh a ni," tiin thuchhuah an siam.

Saudi Arabia hian LGBT an pawm lo a, Hendo-a'n LGBT pawm lohna Saudi club a zawm hi an hrethiam lo a ni.

Sum a pawimawh

Henderson hi kum 33 mi chauh a ni a, England international midfielder a ni. Saudi club a zawm avangin Hendo tan ram tana khelh phak a harsa nghal dawn a, heti chung hian Al Ettifaq pan a thlang.

Liverpool captain meuh tan chuan Saudi club zawm hi thilmak a ni a, chutihrualin a hlawh tur zat thlir hian a mak hran lo. Al Ettifaq hian Hendo hi kar khatah £700,000 bawr vel an hlawhtir dawn a, Liverpool emaw Europe club dang tan Hendo-a hlawhah hetiang zat hi pek theih a ni ve lo.

Tun dinhmuna Premier League-a hlawh tam ber Kevin De Bruyne hian kar khatah £400,000 a hlawh a, goal khung khawl Erling Haaland pawhin kar khatah £375,000 a hlawh. Liverpool chhuanvawr Mohamed Salah-a'n kar khatah £350,000 a hlawh a, a tawi zawng chuan Reds player hlawh tam pahnih Salah leh Virgil Van Dijk te hlawh belhkhawm aiin Hendo hi a hlawh tam zawk dawn tihna a ni.

Midfield set thar

Liverpool-in tun nipuiah player an chan nasa a; Hendo hma hian James Milner, Naby Keita leh Alex Oxlade-Chamberlain te an chhuak tawh. Roberto Firmino pawhin Al Ahli a zawm a, Fabinho pawh Al Ittihad zawm tura sawi a ni.

Hemi a nih avang hian Klopp-a'n mual lai luahlum turin player thar chungah rinna a ngah a ṭul dawn. Brighton leh RB Leipzig aṭangin Alexis Mac Allister leh Dominik Szoboszlai te an lalut tawh a, Southampton aṭangin Romeo Lavia an beisei mek bawk.

German manager Klopp-a'n ngaihtuahna thar a sen a ṭul dawn a, Trent Alexander-Arnold pawhin hna thar a nei a nih pawhin a mak lo ang. Premier League leh Liverpool tan Hendo awm lo tur hi a uiawm a, chutihrualin season thar tingaihnawmtu a ni thei thung.