Medvedev leh Kyrgios inhnukdawk

Mipa tennis world number 3 Daniil Medvedev leh Australian tlangval Nick Kyrgios te chu US Open inbuatsaihna zinga pakhat - Washington Open aṭangin a inhnukdawk, player pahnih hian hliam an neih vang a ni.

Russian tlangval Medvedev hian season a hmang ṭha hle, kumin chhungin nomawi panga a chawi tawh - Rotterdam, Doha, Dubai, Miami leh Rome Open-ah a hlawhtling vek. Wimbledon khelh zawh takah khan semifinal a lut bawk.

Mahse, kum 27 mi Medvedev hi grass court inelna lian hnuah a la inlan leh rih lo. Vawi khat a champion tawhna US Open-ah ṭha leh dam ver vawra a inlan theih nan inenkawl ṭhat hmasak a duh a ni.

Kyrgios hi Washington Open champion lai a ni, kuminah pawh mipui enchak zingah a tel. Mahse, hliam vangin a buai ngun ta hle - tun season Grand Slam pathum an khelh tawhah pawh hliam vangin a inlan thei lo vek.

July 31 aṭanga August 6 chhunga khelh tur tournament-ah hian Japanese tlangval Kei Nishikori, French player Gael Monfils leh South African player ṭha Kevin Anderson te chu an inlan theih nan wildcard pek an ni thung.