Chiesa faktu Juve coach

Juventus coach Massimiliano Allegri chuan season thar atana inbuatsaihna an neih danah a lawm tih a sawi a, a bik takin Federico Chiesa khelh dan chuan a ti lawm tih a sawi tel bawk.

Nimin zing khan Juve hi AC Milan nen an inkhel a, 2-2 a an inhnehtawk hnuah penalty pet niin Old Lady hi 4-3 in an chak. Milan hian Malick Thiaw leh Olivier Giroud te hmangin vawi hnih hma hruai mah se Danilo leh Daniele Rugani ten an sut ve ve a ni.

Old Lady manager Allegri chuan, "Nipui chawlh kan nei vang vang a, chumi hnuah match kan khelh lehna hmasa ber a ni. Team ṭha tak Milan kan khel a, anni kha inthlungnghet sa leh team hlauhawm an ni, an laka kan khelh dan khan min ti lawm.

"Season hmasa khan harsatna hrang hrang kan tawk a, chutiang karah chuan pasarihna kan ni thei. Kan dinhmun kha lungawina chi a ni lo, chutihrualin kuminah hian ṭha takin kan tho chhuak thei a ni tih kan lantir a ngai," a ti.

Player lakluh nana sum hman dan chungchangah Juve hian dan an bawhchhia tih hriatchhuah a ni a, a tirah point 15 an paihsak. An point paihsak hi pek let an ni leh a, amaherawhchu season tawp lamah an paihsak leh hnuhnawh.

Tun ṭuma friendly match an khelhah hian Juve tan Chiesa a hmuhnawm. Italy international hi Juve innghahna leh player beisei awm tak a nih laiin na takin a hliam a, a hliam dam hnuah ngai a la awh leh lo - kuminah erawh a bul aṭangin ṭha takin a khel thei dawn niin a lang.

Allegri chuan, "Ka naute khan danah ka lawm, a bik takin Chiesa che vel kha a hmuhnawm ka ti. Kum naupangte ni chungin mi hriat a hlawh a, chumi hnuah hun harsa tak mai a hmachhawn, chu a harsatna chu a rawn hneh pumhlum dawn ta niah ka ngai," a ti.

Juventus hian August 3, Ningani zing dar 5:00 hian Real Madrid an hmachhawn leh dawn, hei hi season thar inbuatsaihna match hnuhnung a ni tawh ang. Serie A bul ṭan nan Udinese (August 21) an tum dawn a ni.