Formula 1: Nipui chawlh hma intlansiak hnuhnung ber
Pathianni zan dar 6:30 hian Formula 1 Belgian Grand Prix an tlan dawn, tun season chhung atan chuan nipui chawlh an hman hmaa intlansiak hnuhnung ber a ni tawh dawn a, a hmuhnawm leh dawn tia sawi ngam a ni.
Fur ruahtui tlak lai a ni a, tlankawng hmingthang Spa-Francorchamps chu a huh leh ngei pawhin a rinawm, hei hian intlansiak a ti hmuhnawm ṭhin, chutihrualin driver tan erawh chetsual a hlauhawm ṭhin thung.
Car intlansiakna sang ber hi kuminah vawi 22 tlan tura ruahman a ni. Belgian Grand Prix an tlan zawh hian an chawl lailawk dawn. August thla tawp lamah season chawhnu lam bul ṭan nan Dutch Grand Prix an tlan leh chauh dawn a ni.
Vawi riat beiseina
Formula 1 season kal laiah Red Bull leh an driver ṭha bik Max Verstappen chu dan theih lohin an kaltluang mek a, an elpui team dang hmaah chak takin an tlan. Tun kar tawpah hian Verstappen a chak leh a nih chuan a zawna vawi riat pakhatna a nihna tur a ni dawn.
Kumina intlansiak 12 awm tawhah Red Bull an la chak vek, tun hma lama McLaren-in vawi 11 chak zawn record an lo siam tawh chu an khum fel a, an record thar hi belhchhah theihna remchang an nei dawn tihna a ni.
Dutch tlangval Max-a tan hnehna a chang leh a nih chuan vawi 45 a chak tlinna tur a ni nghal dawn bawk a, atan a pawimawh hle. Spa tlankawngah hian season hmasa khan a lo chak tawh bawk, kuminah pawh a chesual viau a nih ngawt loh chuan rinkai ber a ni dawn.
Chutihrualin, Red Bull driver hi chak chiang tura dah nghal ngawt erawh a rem bik lo. Tun hnaiah Mercedes leh Lewis Hamilton ten nasa takin hma an sawn, tun ṭuma an tlanna tur hi Ferrari tlan ṭhatna ṭhin a ni bawk - inelna a hautak dawn hle.
Fimkhur a ngai
July thlatir khan Spa tlankawngah hian Formula Regional European Championship buatsaih a ni a, kawng huh chungin inelna an buatsaih - vanduai thlak takin Dutch rawlthar Dilano van’t Hoff chu chesualin a thi.
Tun kar tawpah pawh ruah a sur leh rin a ni a, hei vang hian world champion vawi sarih ni tawh Lewis Hamilton chuan F1 thuneitu sang Federation Internationale de l'Automobile (FIA) chu uluk taka thutlukna siam turin a ngen.
Britain tlangval Hamilton chuan, "Eng emaw thil danglam thleng tur a awm a nih chuan FIA lam aṭangin a rang lama hriattirna kan dawn ka beisei, an lakah rinna ka nghatin thutlukna pawh fimkhur leh dik taka an siam ngei ka ring," a ti.
Red Bull driver Sergio Perez leh Alfa Romeo driver Valtteri Bottas te pawhin, intlansiak leh an nunna chu FIA kutah thui tak a innghat tih an lo sawi tawh. Khaw awm dan tur hriatlawk vek theih a ni si lo - Pathianni zanah engkim a chiang ang.