Tualchhung football season thar an ṭan leh ta; Tlai dar 1:00-ah Aizawl FC Vs Chanmari FC

Tualchhung Football ngaina tan chuan inkhel thlir tur a awm leh ta a, season ṭan nana hman ṭhin GIG Motors I Day Football Tournament 2023 chu vawiin aṭangin RG Stadium-ah khelh ṭan a ni dawn.

Ni hmasa berah inkhel hmuhnawm bik thlir tur a awm nghal dawn a, club ṭha pahnih Aizawl FC leh Chanmari FC te chawhnu dar 1:00-ah an inkhel dawn. Chawhma dar 11:00-ah FC Venghnuai leh Electric Veng FC te an inkhel bawk ang.

Final tenau

Chanmari FC-in nikum season tawp lam khan coach atan K. Malsawmkima an lalut a, beisei angin result nei ṭha lo mah se MPL-ah an inhamtang. Tun season-ah erawh chet ṭhat ngei an tum a, Mala'n a duh ang player a lak bakah inpuahchana an nei hma bawk.

Aizawl FC erawh I League club an ni a, team ngelnghet an ni. I League club an nih miau avangin tualchhung player an duh ang deuh thaw thur thei an ni.

Chutihrualin AFC hi an la kim dawn lo a, head coach an la tihfel loh avangin coach Victor Lalbiakmawia hoin I Day Football an hmachhawn dawn.

AFC hian tlarhma lamah Lalrinzuala, Zomuansanga leh Lalbiakdika te an lalut a, engtin nge an rawn rem ang tih hriat a châkawm hle.

Chanmari FC hi season liam ta an che ṭhat lohna chu defender mawhphurna la thei an neih loh vang a tih theih a, tun ṭumah erawh Lalthlahlova (K. Patea) an kawl. Tlarhma lamah tualchhunga tawnhriat nei ṭha Lalkhawpuimawia an neih belh a, kil tinah player ṭha an awm. Coach Mala tan pawh thutlukna siam a har dawn a, chutihrualin Mala vanneihna erawh tualchhung football hrechiang assistant coach Laldampuia a nei hi a ni.

Electric Vs Venghnuai

Group A aṭangin Aizawl FC leh Chanmari FC te hi semifinal lut tura rinkai an ni a, mahse fixtures a awm dan avangin thil danglam a thleng thei tlat. Vawiin chawhma dar 11:00-a Electric Veng leh FC Venghnuai inkhel result hian nghawng lian tak a nei ang.

Season liam taa MPL-a Venghnuai final thlenpuitu coach Lalrindika Hmarin Chawnpui FC a zawm a, player ṭhain coach hi an zui nual. Hei vang hian Venghnuai squad hi a chhah thei lo a, chutihrualin CYMA Football hnuhnung berah veng angin an champion tih hriat a ṭha.

Tawnhriat nei ṭha C. Ramdinmawia'n Venghnuai hi a la ho thei dawn a; Jesse Vanlalmuana, C. Ngurnuntluanga leh RM Zothansanga te an la awm bawk avangin an tlo phian ang. An khingpui tur Electric Veng hi Aizawl South Football Academy nen an intlunzawm a, kum la naupang deuh mah se training an nei ṭha.

Electric Veng FC kaltlangin player thar an chhuah a rinawm a, hei hi EFC inkhel en châkawm chhan a ni. Coach Francis Rambeiseia chuan, "In enchhinna atan kan hmang dawn a, player naupang zawkte kan ring ngam ang," tiin Vanglaini a hrilh.