England laka hattrick siamtu Remsiami; Spain leh England chungah India an awm

Ram ni tla seng loa roreltu tih an ni ṭhin a, tlema upa deuh te rilruah chuan 'Kumpinu' tihin a chiang - England ropuizia inhrilh nawn a ngai lo; Mizote tan chuan an sang lutuk niin an lang, mahse Lalremsiami Hmar chuan England goal-ah vawi thum a vaw lut!

Hockey inelna 100th Anniversary Spanish Hockey Federation - International Tournament-ah Mizo nula Remsiami awmna India chuan nimin tlai khan Spain an hmachhawn zui lehnghal a, 3-0 in an chak.

India, Spain leh England te vawi hnih ṭheuh an inkhel kual a, tlawm nei lo India chuan point riat hmuin a chung berah an awm. An match hmasa lamah ram pahnih hi an inhnehtawk pui ve ve a, an intawn vawi hnihnaah an hneh ve ve thung.

Siami chuan, "Ka beisei phak bakin thil a thleng. Tun hmain England hi kan la hneh ngai lo a, kan hneh vawi khatna a ni. Chuvangin ram dang kan hneh nen a hlut dan a inang lo, engkim mai kha Pathian malsawmna avanga lo thleng a ni," tiin Vanglaini a hrilh.

Inrinni tlai inkhelah a tir aṭanga a tawp thlengin Kolasib nula Remsiami a hmuhnawm a, minute 13-naah goal khung ṭanin 17 leh 56-ah te a khung belh a, English goalkeeper Sabbie Heesh a a ching phar hneh hle.

England nen hian July 26, Nilaini khan 1-1 in an lo inhnehtawk tawh, he inkhelah hian England tana Holly Hunt-i goal khung chu India hian Remsiami hmangin an lo sut tawh bawk.

India nulate hi Asian Games khel tura intuaihriam lai an ni, tun hnai khan Germany ramah an lo feh chhuak tawh bawk a, an result zawng zawngah duhthusam ni lo mah se inbuatsaihna an nei ṭha tawh hle a ni.

Asia khawmualpui ramte inelna lian Asian Games hi September 23 aṭanga October 8 chhungin Hangzhou, China-ah neih a ni ang.