Xavi a ṭawng fimkhur

Barcelona manager Xavi Hernandez chuan Real Madrid lakah 3-0 in hnehna chang thei mah se inchhuang thei an ni lo tih a sawi a, an inkhel result avangin uchuak taka inrintawkna neih chu a rem lo tih a sawi.

Season thar inbuatsaihin Spanish club lian pahnih hi USA-ah an zin. Nimin zing khan Arlington, Texas-ah friendly match an khel - Catalan club tan Ousmane Dembele-a'n hma taka goal a khung bakah Fermin Lopez leh Ferran Torres te chuan a tawp dawnah an khung belh.

Real Madrid an vanduai, an player thar Jude Bellingham pawhin woodwork a tihper a, ṭum nga ngawt woodwork an tihper, an vanneih ṭum ni se la chuan goal pawh an khung ngei a rinawm hle.

Barca coach Xavi chuan, "Result chauh en chuan inkhel chanchin a hre kim lo, si thum faia kan chakna hi kan inkhel chanchin tak tak a ni lo. Ka naute an khel ṭhain lawmna tur a tam, result pawh duh ang taka ṭha a ni bawk.

"Mahse, Real Madrid pawh khan goal khung theihna remchang an nei hnem hle a, chumiin a entir chu hmasawn ngaihna lai kan ngah," a ti a, an match hmasa zawkah Arsenal hneh lo mah se an insiamṭha chak hle.

Real Madrid tan Vinicius Junior chuanh penalty a hlah a, Brazilian forward ṭha hian penalty aṭang bakah vawi khat dang chu goal bar a tih per, goal hmaah a vanduai ṭum a tawng - a vanduai reng bik lo ang tih erawh a rin theih.

Real coach Carlo Ancelotti chuan, "Chak loh hi chu a hrehawmin a na bawk, kan result a ṭhat loh avangin pawi ka ti hle. Kan ṭhat tawk lohna lai ka siamṭha thuai ang.

"Match khata vawi nga ngawt mai woodwork tih per chu thil mak a ni a, hetiang hi a thlen theih pawh ka ring ngai lo hial. Mahse, football-ah chuan thil mak tak a lo thlen chang a awm ve leh ṭhin," tiin a sawi.

US lama an zin tih tawp nan Barcelona hian August 2, Nilaini zing dar 8:30 hian Las Vegas-ah AC Milan an hmachhawn dawn. Real Madrid erawhin Orlando lamah Juventus an hmachhawn thung ang.