Hojlund-a'n Old Trafford a pan dawn ta

Manchester United leh Atalanta chu Denmark international striker Rasmus Hojlund chungchangah pound maktaduai 72-in an inrem. Denmark international striker hian season ṭantirh aṭangin Man United tan a khel thei dawn.

Kum 20 mi Hojlund manah hian Man United-in pound maktaduai 64 an pe phawt ang a, a chet ṭhat dan a zirin pound maktaduai riat an pek belh leh ang. Danish striker hian kum nga daih contract a ziak a, kum khat pawhsei theih dan a awm bawk.

Sum an theh chhuak

Man United hian tun nipui bazara an lak hmasak ber chu Mason Mount a ni a, pound maktaduai 55-in an lalut. Chelsea aṭanga Old trafford pantu Mount hi pre season match hmasa bera Leeds United an hmachhawn ṭum aṭangin a inlan nghal.

Erik Ten Hag-a'n goalkeeper-ah ke hmanga ball sem thiam a duh a, Dutch manager hian 'risk' lain Golden Glove dawngtu David de Gea contract pawhsei sak loin Inter Milan aṭangin Andre Onana chu pound maktaduai 47.2-in an lalut. Onana hian friendly match-a Real Madrid an hmachhawn ṭuma khelin goal hnih a chhuah a, sawiseltu awm bawk mah se Ten Hag-a duh ang takin tlarhnung aṭangin ball a sem ṭha hle.

Man United hian Real an hneh loh ṭumin tlarhma bil zia an hmu chiang a, number 9 an mamawhzia an hrechiang lehzual. English club hian Hojlund manah pound maktaduai 60 hnuai lam sen tum mah se a tlawm zawkah an ṭang. Pound maktaduai 64 an pe phawt dawn a, pound maktaduai 72 hial pawh an seng thei.

United hian tun season-ah player manah pound maktaduai 166.2 an seng tawh a, an player lakte hi an che ṭha a nih phei chuan pound maktaduai 180 hial an seng thei ang.

Mamawh chhanna

Manchester United chuan tukin zing dar 6:30 hian Borussia Dormtund nen Allegiant Stadium, Nevada-ah friendly match an khel dawn a, striker thar hi an la ziahluh fel loh avangin Hojlund-a chungchang a la sawi duh lo.

Ligue 1 champion Paris St-Germain pawhin Hojlund hi an beisei a, PSG hian sum an thehchhuah tam ngam loh bakah Danish striker hian Old Trafford-a kal a thlang.

Man United-in Hojlund hi an duh ringawt lo a, Danish striker pawhin Ten Hag-a hnuaia khelh a thlan avangin boruak a ṭha nghal. United hian season liam ta khan goal khung thei number 9 an nei lo a, inhliam vangin hun rei zawk Anthony Martial a khel thei lo. January thlaa an lakluh Wout Weghorst-a'n league match-ah goal a khung lo a, mamawh chhanna an ni lo ve ve.

Hojlund pawh hi statistics thlir mai chuan season liam ta Serie A-ah goal kua chauh a khung. Amaherawhchu kum 20 mi striker hian season tir lamah khelhna hmun a chang tam tawk lo a, minute 45 aia tam match 20 chauh a khelh avangin a record hi a chhe hran lo.

Denmark tan Hojlund hi a che ṭha lehzual a, ram tan match ruk a khelhah goal ruk a khung. Feet ruk leh inches thuma sang striker Hojlund hian theihna sang tak a nei a, a kum zat thlir chuan Old Trafford-a rinrawl nih chu a har dawn tih a hriat theih a, chutihrualin mamawh chhana pawh a ni nghal thei bawk.

Engtin zel?

Manchester United-in Borussia Dortmund an hmachhawn zawh hian United States an chhuahsan dawn a, US Tour-ah chuan Hojlund hi a tel hman dawn tawh lo.

August 5, Inrinni hian Man United hian Lens nen Old Trafford-ah friendly match an khel dawn a, document an ti fel hman a nih chuan Hojlund hi khel hman thei dihmunah a ding.

Ten Hag-a hote hian August 6, Pathianni hian Athletic Bilbao nen Aviva Stadium, Dublin-ah friendly match hnuhnung ber an khel dawn. August 14, Thawhṭanni zan hian Premier League match hamsa berah Wolverhampton Wanderers an mikhual ang.