MBA Championship an zo; H. Lalṭhazuala a thiam ber

Tualchhung badminton inelna lian - MBA Official Championship Badminton Tournament 2023 khelh zawh a ni a, inelna ngaihven hlawh tak mipa singles-ah Chanmari West rawlthar H. Lalṭhazuala a champion a, men's singles champion thei naupang ber a ni.

Bawngkawn YMA Hall-a inelna neihah hian, final a hmuhnawm. Mizo rawlthar beisei awm tak Ṭhazuala hian C. Lalramzauva chu 21-11, 21-8 in a hneh a, champion tura a kalkawngah hian harsatna a tawk lo tiin a sawi theih.

Kum 16 mi chauh a la ni a, mipa singles huangah hian tualchhung player ṭha zual 60 ngawt an inlan. Mahse, Ṭhazuala hian a hma a ding apiang a hneh zel, final lut tur pawh hian seeded pakhatna Malsawmsanga (Esha), Lalramdinthara Pachuau leh Zarzokima te a hneh.

Pullela Gopichand Badminton Academy (PGBA) hmuna inzirlai a nih avangin a danglam, tun ṭum hi MBA Senior ranking tournament a khelh vawi khatna ni mah se a mikhual lo hle; tun kar chhung hian MBA Junior Championship a khel leh ang, chumi hnu chuan a inzirna hmun lamah a kal leh dawn a ni.

Kumin chhunga national level-a gold medal pahnih la tawhtu Ṭhazuala chuan, "Badminton a khelh theih nana kawng min sialsaktu ka nu leh pa chungah lawmthu ka sawi a, coach-te zarah ka hlawhtling. Pathian min hruaina avangin ka lawm, bul ṭan tir chauh ka nih avangin ka kal zelnah turah min ṭawngṭaipui turin ka sawm che u," tiin Vanglaini a hrilh.

Abigail-i leh Jojo-a

Abigail Lalṭhazuali (SBC) leh Joseph VL Ringngheta (CSC) te chu inelna pahnihah an champion kawp thei, anni pahnih ṭangdun hian mixed doubles final-ah Lalbiaksanga (Mizoram Police BC) leh Lalduhzuali (Durtlang BC) te chu 15-21, 21-16, 21-11 a hneh in an champion.

Saron Veng tleirawl Abi-i hian women’s singles final-ah Lalrinhlui, Saron Veng tho, Ralte Villa Badminton Club tana khel chu 21-18, 22-20 a hneh in a champion. Joseph-a pawh hi C. Lalramzauva nena ṭangdunin Men’s Doubles-ah a champion bawk a ni.

Mizoram Badminton Association (MBA) leh Bawngkawn Badminton Club (BBC) te tangkawp buatsaih inelnaah hian, category panga- Men’s singles, Women’s singles, Mens’ doubles, Women’s doubles leh Mixed doubles-ah te inelna neih a ni.

Women’s doubles-ah seeded number 1 Lalrinhlui leh Zothansangi (Ralte Villa BC) te inkawp chuan seeded number 3 Lalvenhimi (Chaltlang BC) leh Ramngaihzuali (Ralte villa BC) te ṭangdun chu 21-18, 21-19 a hneh in an champion bawk.