Saudi lamah Saint-Maximin a chiang ta

French winger Allan Saint-Maximin chuan Newcastle United a chhuahsan tih a tichiang a, he thuziak i chhiar meuch chuan Saudi Pro League club Al-Ahli a zawm fel tawh ang - a man hi pound maktaduai 30 niin an sawi.

Kum 26 mi forward hian Magpies-ah hian kar khatah £93,000 vel a hlawh nia sawi a ni a, Al-Ahli a zawm hian kar khatah £2,00,000 a hlawh dawn nia sawi a ni - Saudi sum mawmin player a hip lut zel.

August 2019-a Nice aṭanga Newcastle zawmtu Saint-Maximin chuan, "Ka zinkawng zawh ho chu tawp tawh angin lang mah se, kan thawnthu erawh a la tawp lo. Newcastle hi ka tan chuan in ang mai a ni.

"Nangmahni thlawptu ka ni reng ang," tiin a thlah a, match 124 a khelhsaka goal 13 a khungna Newcastle chu a mangṭha - a kum zat ngaihtuahin, tam tak chuan Saudi pan hun atan chuan a hma hret tiin an ui khawp ang.

Newcastle hian Saudi PIF-in an lei hnuah indinthar hna an thawk mek a, season tharah Champions League hial an khel dawn. Mahse, coach Eddie Howe ruahmannaah Saint-Maximin hi a tel ve tawh lo niin a lang a, a tan chuan chhuah mai hi thutlukna fing a ni.

Saint-Maximin chuan, "Newcastle zunah hian ka uai a, he club-in hun thim tak a tawn laite khan chhuah theihna remchang chu ka nei. Mahse, ka lo hmangaih hman êm avangin ka tlai zo tawh a ni.

"Cham zel kha ka duhin, ka mamawh a, ka tan chuan he team hi engkima engkim a nih avangin Premier League-a inhamtang tura ka theihna zawng zawng ka hlan kha a ṭul a ni," a ti a, Magpies tana a rinawm ṭhin thu a sawi lang.

France tana age level hrang hranga inlan tawh Saint-Maximin chuan sawi zawmin, "Kha hun thimah khan mi tam tak chuan he club hi an ringhlel mahna. Mahse, kei chuan beiseina ka nei tlat a, eng nge kan thlen tak hi, en ta che u.

"Hmuh a nuam êm êm a, Newcastle chu a awmna tur taka awm chungin ka thlah ta. He club-in tun dinhmun a thlen theih nana tha thawhtute zinga ka tel avangin, ka tan chuan hei hi nomawi ropui ber chu a ni," a ti a, Magpies tana a hnathawhah a lungawi.

Newcastle hian season tharah Champions League an khelh dawn avangin squad thuam chak an mamawh a, chutihrual chuan sum nei ringawt mah se, club sum lakluh leh an sen tum zat a inmil loh avangin, financial fair play dan aṭanga an him nan player ṭhenkhat an hralh ṭhen a rul.

He indintharna tuartu zingah Saint-Maximin a tel, tiin a sawi theih a, Magpies hian an sum lakluh leh thehchhuah a inbuk tawk theih nan an hralh - chutihrual chuan Al-Ahli-a share tam zawk neitu hi Newcastle neitute tho an ni a, a hralhna man zata sawi £30mtd hi chu lehkhaa inziak chauh a ni mai thei!

Newcastle hian nipui transfer-ah player langsar tak tak an melh ṭan a, Italy midfielder Sandro Tonali chu AC Milan aṭanga £55mtd-a la lutin, England winger Harvey Barnes chu Premier League aṭanga tla hlim Leicester City aṭangin £38mtd-in an la lut tawh bawk.