Fabinho dinhmun a la chiang lo

Liverpool midfielder Fabinho chuan Saudi Arabia lama pem turin indawrna a la kalpui mek zel a, mahse, he thu buatsaih a nih lai hian thutlukna siam fel a la ni lo.

Saudi Pro League club vek Al-Ittihad chuan Fabinho hi pound maktaduai 40-a lei an tum a, club lamin indawrna an kalpui rem ti mah se, anmahni lam hi an la inremfel hleithei lo a ni ber.

Liverpool boss Jurgen Klopp chuan hemi chungchang hi sawiin, "Engmah thutlukna siam fel a la awm lo. Pre-season tour-ah kan hruai miah lo a, hei hian thil awmzia chu thui takin a hrilhfiahin ka hria. Mahse, ka hriat chinah erawh a club tur a la tifel lo.

"Heng thilte pawh hi kan ngai neih mai a ngai tawh a, tun hma ang khan engkim a kal vek ngawt thei lo. Chuvang chuan engmah a thlen hma a, lo sawi zung zung hi a ṭul lem lo a ni," a ti a, Fabinho-te la inrem loh thu a sawi.

Reds hian nipui transfer-ah midfielder ṭha Alexis Mac Allister leh Dominik Szoboszlai an la lut tawh a, player pahnih lak nan pound maktaduai 100 dawn an seng. Mahse, Hendo a chhuah bakah Fabinho a chhuak hnai a, midfielder lei belh an mamawh dawn niin a lang.

Klopp chuan, "Midfield-ah hian hnathawh kan ngai tih hi chu kan hriat sa a ni a, thil lang chiang tak a ni. Tunah hian a chinfel hna kan thawk mek," a ti a, Reds hian midfield thar an nei ngei dawn niin a lang - Liverpool fans tan season thar a nghahhlelhawm duh khawp ang.