Hendo kan chelh zo lo - Klopp

Liverpool boss Jurgen Klopp chuan a captain Jordan Henderson chu chelh tum mah se, a hlawhtlin loh thu a sawi - Hendo hian Ningani khan Saudi Arabian club Al-Ettifaq chu a zawm a, a man zat atan hian Saudi club hian pound maktaduai 12 an seng. A khelh ṭhat dan a zirin a man hi a san belh theih ang.

Klopp chuan a captain chungchang hi sawiin, "A chhuak duh a nih chuan a kalkawng kan lo dalna chhan tur kha ka hre lo a ni. Hendo khan thil chiang takin a hria a, chu chu chelh kan duh, tih kha a ni.

"Khatiang ang hunah khan zah tak chung leh rilru dam taka inthlah nan, tih tur ṭul ang chu kan ti vek a ni," a ti a, English midfielder chu an zawrh lai a nih avanga chhuah an ni loh thu a sawi.

Hendo hi player thiam bik tia sawi tur ni lo mah se, a thawhrimna leh hruaitu ṭha a nihna hian a buk a tirit lo thei lo a, season tharah, tuin nge Reds tan captain armband hreng ang, tih chu zawhna awm mek a ni.

Kum 33 mi Hendo hian tuna a club khelhna tur coach Steven Gerrard hi thlakin, Liverpool captain armband a hreng ṭan a, Reds tana captain hlawhtling ber pawl niin, Premier League, League CUp, FA CUp, Champions League, UEFA Super Cup leh FIFA Club World Cup thlengin champion nomawi a chawi.

Hendo hi mihring dikna chanvo piahlamah, neih iang inkawpte thlawptu langsar a ni ṭhin a, heti chunga a hma lo lak tawhnate tlawmsan a, heng zawng zawng hnual suatna ram Saudi Arabia lam a pan chuan sawisel a tawh phah nasa hle.

Klopp chuan, "Hendo chelh tura amah hmin tum kha awmzia a awm lo a, kei chuan thil thleng milin hma ka la zel chauh zawk a ni," a ti a, a Captain chu harsatna siamsak loa an chhuahtir thu a sawi.

German coach chuan sawi zawmin, "Hendo hi tunah chuan kan zingah a awm tawh lo. He team hi a ngai ve ngawtin kan ring a, keini pawhin kan ngai a ni. Mahse, kan lunglennaa chambang reng thei kan ni lo," a ti.

Hetihlai hian Klopp chuan Liverpool captain turah thutlukna a siam tawh thu a sawi a, mahse, Borussia Dortmund boss hlui chuan, "Vantlang hriata ka puan hmain, player-ten an hriat phawt a ṭha a ni," a ti a, official taka Henderson thlaktu tur puang thei an la nih loh thu a sawi.