Fury-a'n Wilder tukdawl a tum

British boxer Tyson Fury chuan Deontay Wilder nen an inhnek leh hunah judge-te thutlukna a mamawh loh tur thu a sawi a, point hmang maia American fighter hneh a a tum lo. 

Kum 31 mi Fury hian WBC heavyweight title kawltu Wilder chu February 22 khian Las Vegas khawpuiah a hmachhawn leh dawn a, kum 2018 khan lo inhnek tawhin Los Angeles-a an inhmachhawn hi sawisel hlawh takin in draw angah puan an ni. 

Fury hian-a trainer Ben Davison pawh thlakin Javan 'Sugar' Hill chu a thawhpui a, a trainer a thlak chhan pawh hi Wilder knockout ngei a tum vang a nih thu a sawi. WWE thlenga inlan tawh Fury chuan, "Sugar Hill bula training ka neih chhan chu Wilder hi knockout ngei ka duh vang a ni a, inhnek satliah tura lokal tum ni ila ani hi ka ruai kher lo ang. Ben Davison nen khan thawkdunin style ngai te tein kan ti leh mai ang chu," a ti!

Vawi 30 inhnek a hmachhawna la tlawm lo Fury chuan, "Kan inhnek hmasak khan chiang takin hnehna ka chang a, tunah pawh ka chak leh ang. Kum thum chhung ring rap tawh lo kha min hmachhawn a, mahse 'champion' tia an chhuan em em kha tlawm taka a lan loh nan 'draw' an puan a ngai si a ni," a ti!

Los Angeles khawpuia press ho a hmachhawnnaah Fury chuan sawi chhunzawmin, "Points decision-a lungawi turin ka rawn kal dawn lo. Inhnek vawi kua ka hmachhawnah chutiang result chu ka nei tawh a, ka ngah mah mah tawh. Knockout turin ka rawn kal dawn," tiin vaupung a bei na hle.