Boca Junior zawm tur Edison Cavani

31st July, 2023

Footballer pem apiangin Saudi Arabia lam an pan emaw tih mai tur a nih laiin, Uruguay striker Edinson Cavani erawhin Boca Juniors a zawm dawn a, Valencia-ah contract la nei mah se, a contract hi tihtawp a ni.

Kum 36 mi striker hian season hmasa nipui lai khan Manchester United aṭangin Valencia hi a zawm a, June 2024 thleng khel turin contract nei mah se, match 28-ah goal sarih chiah khungin, Spanish club nen hian an inṭhaṭhen dawn.

"Valencia CF leh Edinson Cavani chuan a contract neih lai chu titawp turin inremna an nei a ni," tiin thuchhuah an siam a, Argentina lam a hawi zui dawn.

Uruguay tan vawi 136 inlana goal 58 khungtu Cavani hian an ram club Danubio aṭanga a professional zinkawng zawh ṭanin, January 2007 khan Serie A club Palermo a zawm.

Palermo tan hian match 117 khela goal 37 khungin hming a chher a, kum 2010 khan Napoli-in an lalut - hei hi a hming chher tak takna a ni. Season thum lek khel mah se, match 138 kaihruai hmanin, goal 104 ngawt a khung.

Napoli-a a season hnuhnung berah hian match 43 khela goal 38 khungin, European club lian tam takte chil a tiput a, kum 2013 khan Ligue 1 club Paris Saint-Germain a zawm. PSG tan hian match 301 khelin goal 200 a khung.

French club-ah hian season sarih khelin, season ruk chhung chu league nomawi a chawipui a, an duh ber leh an thlir ber tia sawi theih Champions League nomawi erawh a chawipui t

a lo.

Kum 2020 khen Manchester United zawmin, a season hmasa berah match 39 khela goal 17 khungin, hming a chher viau a, mahse, a season hnihnaah erawh match 20 chiah khelin goal hnih a khung a, season hmasa ṭan dawn khan Valencia a zawm zui.

Tunah erawh football a la khelh ngai lohna Argentine lam hawiin Boca a zawm dawn - he club hian kum 2022 khan league nomawi chawi mah se, tun season-ah talbuaiin league match table-ah pariatna an ni mek.

Boca hian khawvel huap pawha hriat hlawh player an kawl sa ve nual a, tunah hian United keeper hlui Sergio Romero leh Marseille striker hlui Dario Benedetto te chu Argentine champion team-ah hian an khel mek a ni.