GIG Motors I Day Football : Group of Death Chawnpui Vs Police; Chhinga Veng Vs Project FC

GIG Motors I Day Football-ah vawiin chhun dar 12:00 hian champion lai Mizoram Police-in MPL9 champion Chawnpui FC an hmachhawn dawn. Lalsangzuala Hmar enkawl Chhinga Veng FC-in chawhnu dar 2:00-ah Project Veng FC an hmachhawn bawk ang.

Team ṭha 2

Mizoram Police hian nikum I Day Football-ah khan final-ah Aizawl FC an hneh a, MPL awm hnuah a vawi khat nan nomawi lian tham an chawi. Police hi MPL9-ah pawh champion rinkai ni mah se Police Meet vangin beisei an pha lo a, semifinal an thleng pha lo.

Chutihrualin Police hi a vawi khat nan All India Police Meet-ah an champion. Vawiina inlan tur Police hi I Day Football bakah Police Meet champion lai an ni a, an buk a rit dawn.

Police khingpui tur Chawnpui FC hian coach Lalsangzuala Hmar chân mah se final-a an hneh FC Venghnuai coach Lalrindika Hmar an la lut thung. Rindika Hmar hian player ṭha a senglut a, inpuahchahna ṭha an nei bawk.

Chawnpui hian Vanlalthanga an la lut a, Hualngohmun midfielder ball pet thiam hi ven tham a tling. Tlarhmaah pawh Aizawl FC aṭangin K. Lalrosanga an la lut a, Electric Veng FC aṭangin David Lalchhuanawma an la lut bawk. Inhliam vangin MPL best defender Lalruatfela an la chhawr thei dawn lo a, amaherawhchu Rindika chhawr theih turah Police hneh thei tur player an awm.

Inkhelh hun hi chhun dar 12:00 a nih avangin khaw awm danin inkhel a thlak danglam thei dawn a, nimin lama boruak awm dan thlir chuan drinks break emaw cooling break emaw neih a ṭul khawp ang.

Project fiahna

MPL kai thar Project FC-in Chhinga Veng hmaah fiahna an tawk nghal dawn a, Kolasib club hian Sanga enkawl team laka point an hmu thei a nih chuan result ṭha a ni ang.

Sanga hi season ṭan hma khan Chhinga Vengah a kir a, coach Lalremruata nen an thawh dun avangin team ṭha zinga mi an ni nghal. Chhinga Veng hian result ṭha nei turin player pawh an nei ṭha a, I Day Football-ah erawh an la kim dawn lo.

Chhingcows hian goalkeeper RS Lallawmzuala an chelh thei a, defender Lalbiakhlua chân mah se Abel Lalruatfela an la chelh thei. Goal nawr turin Aizawl FC aṭangin MS Dawngliana an la let a, rawlthar duhawm Suanngaihmuana (Amuana) hi tun season-a hming chher tur zinga mi a ni.