Electric Venga aia puitling zawk Venghnuai

GIG Motors I Day Football 2023 match hmasa berah FC Venghnuaiin Electric Veng FC 3-1 in an hneh. RG Stadium-a inkhelah hian Venghnuai tan C. Ngurnuntluanga, Vanlalhruaia leh J. Lalbiakliana ten goal an khung a, Electric Veng tan Joseph Lalsanglura'n goal a khung ve bawk.

Venghnuaiin tun season atana an match hmasa berah an theihna angin an la khel chhuak lo a, 3-1 hiala an chak chungin an vannei tihtheih a ni. Chutihrualin Venghnuai hian bul an ṭan ṭha zawk a, Jerry Lalchhanchhuaha chuan ṭan chiahah chance ṭha a hlah.

Electric Veng an insiamrem a, Malsawmsanga freekick chu defender Joseph Lalsanglura'n a tauh goal. EFC hi goal an khung hnuah an phur mah mah a, Venghnuaiin an chance ṭha neih an hlah lo.

Minute 24-naah T. Vanlalruata (Rorea) pass ṭha chu C. Nuna'n um lutin siphurh sutna goal a khung. C. Nuna a che ṭha zui a, dinglam aṭanga ṭha zeta a lakluh hnuah a ball pek chhuah chu Jerry-a'n changin Vanlalhruaia a pe, left winger Mahruaia hian minute 31-naah ṭha zetin a pet goal.

Goal hnih an chhuah hnuah Electric Veng ben harhin an awm a, inkhel thununtu zawk niin goal chance pawh ngah mah se an hun ṭha neih an hmang ṭangkai thei lo. Samuel Lawmsiamkima'n theihna a nei a, goal hmaah a hriam lo.

Bench aṭanga Alan Lallawmsiama leh C. Lalhriatpuia te an luh hnuah an nawr na lehzual a, player pahnih hian chance ṭha an hlah ve ve. Hriata ball pet pakhat phei chuan net sir a per avangin EFC bench lam phei chu 'goal' tiin an au hman hial.

A tawpah erawh Venghnuai coach James Lalrammuanawma'n substitution awmze nei a rawn siam a, bench aṭanga rawn lut J. Lalbiakliana'n (Valpuia) a ball vawi khat tawhnaah a pet goal. Venghnuaiin captain C. Ramdinmawia tawnhriat an hmang ṭangkai a, goal dang chhuah belh loin 3-1 in an chak. Electric Veng erawhin inzir tur an la nei a, penalty an beisei ang pek an ni lo bawk nen an phu ang point an hlawh chhuak lo.