Hming dang an leng lo; Verstappen chauh lo chu!
Dawhsan pathum zinga a chungnung ber chu Max Verstappen tana hauh bik ang mai a ni. Red Bull driver hian parukna aṭanga intlansiak bul a ṭan pawhin a hmasa berah a tlan thleng tho, tun hnai Formula 1 intlansiak hnuhnung pariatah a chak fai vek.
Pathianni zana tlan zawh tak Belgian Grand Prix-ah Verstappen a chak ber a, amah hnaih bertu Sergio Perez aiin 22.305 second-in ram tiam a thleng hmasa zawk, a hmasa pahnihah Red Bull driver ve ve an thleng leh tihna a ni.
Red Bull hian tun season intlansiak an neih tawh chinah Verstappen leh Perez te hmangin hnehna an la chang vek, vawi 13 an chak zawn tawh. F1 hi kum 73 chhung neih tawh a ni a, team awm tawh zinga season bul ṭan fuh ber an ni hial.
Max a chungnung
Qualifying lamah a tlan ṭha a, hremna tawk lo ni se la chuan a hmasa ber aṭanga tlan turin a tling. Mahse, season kal laiah 'gearbox parts' a hmang tam deuh tawh, hei vang hian 'five-place grid penalty' a tuar, parukna aṭangin a tlan ṭan.
World champion hian bul a ṭan fuh leh hle, vawi khat an tlan kual chuan palinaah a awm leh der tawh. Lap paruknaah Lewis Hamilton a tlan pel a, lap pakuanaah Charles Leclerc a tlan pel leh bawk.
Lap 44 an tlan tur zinga a hnuhnung ber an tlan lai chuan Verstappen hi fal takin a tlan leh tawh a, a hnungah Perez, Leclerc leh Hamilton ten an rawn zui a, season hmang ṭha Fernando Alonso chu pangana a ni thung.
Dutch tlangval Verstappen chuan, "Hnung tak aṭanga tlan ṭan chunga hnehna chan theih chu a lawmawm bik khawp mai, kawng kawi hmasa kha hman fuh ka tum ngar ngar a, duhthusam vek ni lo mah se ka tlan ṭha hleah ka ngai.
"A pawimawh berah chuan car chak tak kan nei thei hi a ni," a ti. Driver championship lamah point 125 teh meuhin a sang fal tawh a, tunah chuan nipui chawlh, nuam leh hahdam takin a hmang chhunzawm thei tawh ang.
A dang pathum
Red Bull driver pahnih an kal fal a, an hnungah Leclerc, Hamilton leh Alonso ten an zui zel. Driver pathum hian tawnhriat an nei ṭha, a bik takin Hamilton leh Alonso te hi F1 champion tawh an nih avangin Max leh Perez tan inthlahdah a thiang lo.
Ferrari driver Leclerc chuan, "Ka team tan chuan kartawp nuam leh hlimawm tak a ni, mahse kan hmaa tlan Red Bull hi umphak kan tum tur a ni. Anni anga tlan tur chuan hmasawn ngaihna lai kan la ngah hle," a ti.
World champion vawi sarih ni tawh Hamilton pawhin hma a sawn zel, season hmasa aṭang khan chak ni hmel la hmu miah lo mah se tunah chuan a tan hun ṭha a inherchhuak dawn hnai ta ni pawhin a lang, nipui chawlh an hman hi chhawr ṭangkai an tum ang.
Hamilton hian driver championship lamah Alonso a phak lohna chu point khat chauh a ni tawh. Spanish driver Alonso hian tun kar tawp khan kum 42 a tling a, a vanglai pel tawh mah se driver hmuhnawm zingah a la tel phak.
Car intlansiakna sang ber F1 hi ruahman dan chuan tun season atan vawi 22 an tlan dawn, intlansiak 12 chu an zo tawh. Nipui chawlh an hmang dawn - August 27, Pathianni hian season chawhnu lam bul ṭan nan Dutch Grand Prix an tlan leh ang.