An ramah Zverev a champion

Alexander Zverev chuan hun rei tak chhung nomawi a chawi loh hnuah a hlawh chhuak ve leh ta. German tlangval hian Pathianni zana khelh zawh tak Hamburg Open-ah a khingpui Laslo Djere chu straight set hmangin a hneh.

World number 2 hlui Zverev hian darkar hnih tling lo deuhah 7-5, 6-3 in hnehna a chang. Kum 2021 ATP Finals nomawi a chawi hnuah tun ṭum hi a champion lehna hmasa ber a ni a, tennis a khelh hun chhunga title 20-na a ni bawk.

Kum 26 mi Zverev-a'n Hamburg Open hmaa final a khelh hnuhnung ber chu nikum May thlaa khelh Madrid Masters kha a ni, a hnuah French Open semifinal an khelh laiah hliam na tak a tuar, tunah chuan a dinhmun ngai a luah chho leh dawn ta niin a lang.

Zverev chuan, "A nihna takah chuan nomawi hmasa ber lak ang mai a ni, thla 18 hnuah hlawhtlinna ka chang ve leh chauh a ni a, ka tan chuan a lawmawm takzet a ni.

"Ka lawmna belh-chhahtu chu kan ramah ngei mai ka hlawhtling hi a ni. Hamburg hi ka seilenna hmun a ni a, tennis ka khelh bul ṭanna a ni bawk. Ka tan chuan ka lawmna hi thua sawifiah theih a ni lo," tiin a sawi hial.