Silly Point: 2023/24 Khuhhawnna

Kum chawhnu lam a lo inher chhuak a, Domestic leh International Season pawh hmalam penin an phe leh ṭan suau suau ta. Kan hma lawk Khuangchawi Thlaa Cricket tui mite nghahfak, ICC World Cup, India ram ngeiin an thleng tur nen, BCCI leh India ram hrim hrim pawh hi a phusa ṭan der mai a nih hi maw!

Zofate tan zawimuangin kawl a êng

Duleep Trophy leh Deodhar Trophy lamah India hmarchhak team aiawhin, Mizo tlangval hmingte an han chuang ve ta a, mumang ram erawh a ni lo. Mizoram Cricket hian a phak tawkah chuan hma a sawn kan ti thei ang? Chutihrualin, a Association anga player thawh tlem ber erawh kan la ni.

Kan short term goal-ah chuan a lehpeka Players 2,3 tala pun ve te pawh kan tum tawh ang. Kan elpui hmarchhak state-te aia kan Mizo tlangval te, tun season lo awm tura an khawsak danin thui tak a hril ngei ang.

Rahul Dravid leh a hote tan World Cup ṭan hmain thla tam a awm tawh lo a, tuna West Indies an tlawh mekah pawh hian inenchhina atan an hmang tih hai rual a ni lo a, chutihrual chuan Virat Kohli leh Rohit Sharma te tel lo hian, an naute ho hian mawhphurna hi an kovah an la phur zo tak tak lo em aw?

Kumin kumtira lirthei accident na tak tawk Rishabh Pant a fit hman dawn lo tih a chiang a, Shreyas Iyer leh KL Rahul te tan an inhliam dam nan hun a tam tawh lo bawk.

Tin, lu tihaitu pakhat chu, India innghahna Jasprit Bumrah inhliam leh tuna NCA lama a bowling action thar nena theihtawp a chhuah mek hi ni. World Cup atan fit hman tak maw? Bangalore National Cricket Academy-a fitness leh rehab team te tan lu tihaitu tam vanglai tak a ni hial awm e.

Head coach Rahul Dravid leh kaptan Rohit Sharma ten, an bench strength enchinna hun an ngah tawh lo tih an chiang a, tun thla tawp leh Mimkut thlaa khelh tur Asia Cup hian, World Cup lo awm tur hlimthla tam tak a kawhhmuh ngei rin a ni.

Chutihrual chuan rawlthar Yashasvi Jaiswal te, Shubman Gill te tan tun hun hi an hman ṭangkai chuan, an dinhmun sawhnghehna hun remchang a ni.

Engpawhnise, Cricket season thar chibai vek ule