Chelsea defender tur Axel Disasi

Team thar din tuma hma la mek Chelsea chuan Axel Disasi an la dawn. AS Monaco defender hi pound maktaduai 38.57 man a ni dawn a, a man zat turah inrem tawh mah se a contract rei zawng erawh an la puang lo.

Blues hi tun dinhmunah an defender Wesley Fofana a inhliam, a khup hliam zai a ngaih avangin hun rei tak chhung a chawlh a ngai dawn. Fofana hmun ruakah kum 25 mi Disasi hi a awm thung ang.

Fofana bakah hian Benoit Badiashile chu hliam vangin a chawl mek a, season thar bul a ṭan thei dawn lo. Tun dinhmunah Thiago Silva, Trevoh Chalobah leh Levi Colwill te chu tlarhnung laia chhawr tur an neih a ni.

France international Disasi hian kum 2020 August thla khan Ligue 1 club Stade de Reims aṭangin Monaco hi a zawm a, inelna hrang hrangah match 118 khelhsak tawhin defender pawimawh a ni phak.

Tun nipui bazar chhungin Blues hian Nicolas Jackson leh Christopher Nkunku te an lo la lut tawh bawk a, pound maktaduai 23.2 sengin Rennes midfielder Lesley Ugochukwu an la dawn bawk, ani erawh hi chu loan hmangin a chhuak leh nghal ang.

Brighton aṭangin Ecuadorian midfielder Moises Caicedo lak an tum a, an dawrna hmasa erawh an hnawlsak. Pound maktaduai 80 zetin an dawr nia sawi a ni a, an player duh tak la tur chuan sum an hman tam a ngai dawn.

An player neih sa aṭangin - Mateo Kovacic, Edouard Mendy, Kalidou Koulibaly, N'Golo Kante, Mason Mount, Kai Havertz, Christian Pulisic, Ruben Loftus-Cheek, Ethan Ampadu, Pierre Emerick-Aubameyang leh Cesar Azpiliceuta te an chhuak tawh thung.