GIG Motors I Day Football: Project an huai, Chhinga Veng an dingchang

Mizoram Premier League club thar Project Veng FC-in GIG Motors I Day Football an hmachhawn hmasak berah huaisen takin attacking football an khel a, an game huaisen viau mah se club ṭha zawk Chhinga Veng FC lakah 4-2 in an tlawm.

Chhinga Vengin Aizawl FC aṭangin MS Dawngliana an la kir a, tualchhung football-a tawnhriat nei ṭha ber zinga mi Dawngtea hian captain armband hrengin hattrick a siam nghal. Chhingcows tan Johny Lalremruata'n goal a khung bawk.

Kolasib club Project Veng FC tan MS Dawngzuala leh R. Lalchawikima ten goal khat ve ve an khung a, point hlawh chhuak lo mah se an game huaisen tak avangin khelh an harsa dawn.

Dawngtea la chuai lo

Season liam ta khan Aizawl FC-in MS Dawngliana an la lut a, an hmang ṭangkai tawk lo. Season chawhnu lamah phei chuan Bawngkawn forward Dawngtea hi an chhuahtir hial.

Dawngtea hian theihna a la nei a, amah chhawr thiam coach a mamawh thung. Lalsanzuala Hmar-in Dawngtea hi Chhinga Vengah a la lut chat a, hmun pawimawh chantirin captain armband a hrentir a, a chhanletna chu hattrick a ni.

Minute 29-naah Dawngtea'n ball a la lut a, Project Veng defender-ten hun thawl an pe rei hret. Box pawn vel chiah aṭangin Dawngtea hian goal kilah a pet lut.

Minute 32-naah Dawngtea pass chu Johny Lalremruata'n box pawn aṭangin kawh zetin a pet goal. Hemi bikah hi chuan Dawngtea fak aiin Johny-a'n fak a phu a, Project Veng keeper a chesualah a ngaih theih bawk.

Second half-ah Dawngtea a rawn inlar leh a, minute 73-naah Chhinga Veng captain hian Project Veng keeper ball chhuhsakin defender pahnih la awm mah se harsatna nei loin a khung.

Injury time-ah Dawngtea'n fing takin substitute Isac Zomuanpuia tan through ball a pe a, India junior team-ah pawh awm tawh Isac hian Dawngtea pe letin Chhinga Veng captain-in chak nemnghehna goal a khung.

Project hautak

Aizawl khaw pawn tana MPL khelh hi a hautak a, MPL la ṭan chiah lo mah se I Day Football khelh pawh a hautak tho. Project Veng FC 'project' hi a hautak a, Thawhṭanniah Aizawl rawn panin nimin lamah an inkhel nghal.

I Day Football group match vawi thumah Kolasib aṭangin ṭum thum an rawn zin dawn tihna a ni a, a awlsam dawn lo. Chutihrualin nimin lama an khel erawh an player neih dan thlirin an che ṭha hle.

Project Veng hi R. Lalrammawia leh R. Lalruatfela ten an enkawl a, Chhinga Veng lakah huai takin an khel. First half-a goal an khung theih nan Jessie Lalmawizuala'n ball fing a pe lut a, MS Dawngzuala finishing a ṭha ve bawk. Minute 85-naah bench aṭanga lut R. Lalchawikima'n a tauh lut a, Project-in goal hnih an khung.

Kolasib club hi khel chhe lo mah se point an hlawh chhuak lo. Match khelh hmabakah MPL champion Chawnpui FC leh I Day Football champion lai Mizoram Police FC te an awm a, huaisen reng hi a finthlak em, tih erawh an ngaihtuah a ṭul ang.