Saudi lamah Fabinho a kal ve leh ta

Football khawvelin Saudi Pro League lam aṭangin chanchinthar a hriat belh zel a, Liverpool midfielder Fabinho chuan captain Jordan Henderson hnungzuiin Saudi Arabia lam a pan ve leh ta.

Saudi Pro League club Al-Ittihad chuan Fabinho an lakluh thu an puang a, a man zat hi tarlan ni lo mah se an lo dawr tawhna pound maktaduai 40-in an in dawr fel nia ngaih a ni a, kum thum atan contract hi a ziak.

Fabinho chuan Liverpool thlahna thu social media lamah pholangin, "Vawiinah hian ka in chu ka thlah ta a, he jersey hi hlim leh lawm tak, inchhung tak chungin kum nga chhung chu ka lo ha tawh a ni," a ti.

Brazil tana vawi 29 inlan tawh Fabinho hian July 2018 khan AS Monaco aṭangin Liverpool hi £39mtd-in a zawm a, kum 29 mi chauh a la nih avangin a vanglai takin Saudi lam a pan, tiin a sawi theih.

Fabinho chuan, "Ka phak china level sang ber thlengin, World Cup hial ka khel a, Liverpool chungah lawmthu ka sawi duh. Ka fapa pawm chunga khelmuala luhte kha ka duhthusam a ni ṭhin a, hei pawh Liverpool zarah a hlawhtling.

"Khawvela stadium ropui ber leh boruak nei ṭha ber Anfield-ah ka khel thei a, hei pawh Liverpool vang a ni. Ka hun tawna match ropui ber pawh Liverpool tan ka khel a, Barcelona laka kan comeback ropui kha Anfield vanga thleng a ni - ka thinlungah hian a cham reng tawh ang," a ti a, Liverpool chungah lawmthu a sawi.

Fabinho hian Anfield-a hun a hman chhungin match 219 a khelhsak a, goal 11 khungin, assist vawi 10 a nei a, Jurgen Klopp-a hnuaiah Liverpool tan player pawimawh a ni phak - Reds tan hian Premier League, Champions League, FA Cup, League Cup leh FIFA Club World Cup-ah te champion nomawi a chawi.

Brazilian midfielder chuan, "Thinlung lawmnaa khat chungin he thu hi ka sawi a ni. Liverpool hi ka hmangaih a, Reds, kan hun tawn ho zawng zawng avang khan lawmthu ka sawi e - Malin in kal ngai lo ang," tiin a club chu a thlah.

Fabinho hian Liverpool-ah kar khatah £180,000 a hlawh nia sawi a ni a, Al-Ittihad-ah hian kar khatah £425,000 vel a hlawh dawn niin an sawi - Jordan Henderson-a'n kar khata £700,000 a hlawh erawh a phak dawn lo.

Al-Ittihad chuan, "Player ṭha leh ropui tak tak hmanga he team din thar kan tumna atana transfer pawimawh a ni a, tualchhung leh international level thlenga kan hmasawnna turah Fabinho hian min pui thei dawn a ni," an ti.

Saudi club inkhel hi en pawh ni la, i mikhual lutuk lo ang - he team hian Ballon d'Or kawl mektu Karim Benzema, Chelsea midfielder N'Golo Kante leh Celtic forward Jota te an lo la lut tawh a, an coach pawh Tottenham Hotspur boss hlui Nuno Espirito Santo a ni.

Liverpool pawhin an player hi thlahin, "Tun hnai kum nga chhunga hlawhtlinna kan chhara a hnathawhah lawmthu kan sawi a ni," an ti a, Brazil international-in Reds tana a hnathawh chu an hre reng.

Merseyside club hian tun season chu team tharin inelna an hmachhawn dawn, tiin a sawi theih. Fabinho a chhuah leh tak avangin midfielder ringawt pawh panga chu tun nipui transfer-ah an chhuahtir tawh a, Brazilian midfielder hma hian Hendo, James Milner, Alex Oxlade-Chamberlain leh Naby Keita te pawh an lo chhuak tawh a ni.

Reds hian tun nipuiah midfielder Alexis Mac Allister leh Dominik Szoboszlai chiah la la lutin, £95mtd vel an seng tawh a, tun dinhmunah hian Bayern Munich defensive midfielder/right back Joshua Kimmich nen sawizawm mek an ni a, Southampton rawlthar duhawm Roméo Lavia an hnaih tawh viau niin an sawi bawk.