GIG Motors I Day Football Champion lai Mizoram Police an tlo
Tualchhung football-ah Mizoram Police danglamna a lang leh ṭhin. GIG Motors I Day Football 2023-ah nimin khan champion lai Police-in MPL champion Chawnpui FC an lehthal a, 3-2 in hnehna an chang.
Lalrindika Hmar kaihhruai Chawnpuiin Lalhmangaihsanga leh Lalrosanga te hmangin ṭum hnih hma hruai mah se Police-in penalty ṭum hnih hmuin Lalbiakhlua (Hlutea) leh Malsawmfela te hmangin an sut ve ve a, Lalfakzuala'n chakna goal a khung.
Hero to Zero
Inkhelh ṭan aṭangin team pahnihin player ṭha an kawl a, inpuahchahna an nei ṭha ve ve tih a lang a, inkhel a hmuhnawm nghal hle. Chawnpuiin goal an khung hmasa zawka corner kick an hmang ṭangkai.
Minute 15-na lekah corner kick chu Police player-ten an clear theih loh avangin Chawnpui defender Lalhmangaihsanga'n ṭha zetin a pet goal lo. Police keeper F. Lalmuanawma tan chet hman ngaihna a awm lo.
Goal khungtu Hmangaihsanga hi first half-ah vek a chesual a, Police striker Malsawmfela chu box chhungah a titlu a, FC Bethlehem aṭanga Chawnpui zawmtu defender-in penalty a chawi. Lalbiakhlua (Hlutea) a rawn pen chhuak a, keeper John Lalruatfela dive dik mah se a goal tho. First half-ah 1-1 a ni.
Zero to Hero
Second half-ah pawh Chawnpui bawkin goal an khung hmasa zawk a, Lalfakzuala'n fimkhur loh vangin box bulah ball a hloh. Vanlalrempuia'n (Tetea) Fakzuala ball chan lai a pet persak a, K. Mama'n changin Lalrosanga a pe nghal. Minute 66-naah Lalrosanga'n hmahruaina goal a khung.
Police captain Fakzuala'n a tihsual siam ṭhat nan minute 83-naah penalty a hlawhchhuak leh thung. Fakzuala hi thiam takin box chhungah a tlu a, referee duhsakna a dawng bawk. Malsawmfela rawn pen chhuakin awlsam takin minute 83-naah a khung.
Minute 83-naah Sawmfela'n a class sanzia a pholang a, Lalbiakhlua (Biaktea) tan through ball ṭha bik a pe. Biaktea hian angle zim takah goal-a pet thlangin keeper John-a'n dang mah se a per chu chang lehin Fakzuala a pe a, Police Captain hian a tawnhriat hmang ṭangkaiin cool zetin a kheng lut. Police 3-2 in an chak.
Chawnpui an lawm lo
Chawnpui hi vanneih ṭum ni se chak thei an ni a, Aizawl FC aṭanga an lakluh Lalrosanga a khel ṭha a, ṭha taka a khalh luh hnuah a crossball ṭha chu David Lalchhuanawma'n a khung lo.
2-1 a hma an hruai lai pawhin captain Vanlalthanga'n chance ṭha bik a hloh. Chawnpui lungawi lohna erawh penalty an chawi danah a ni thung. Coach Lalrindika Hmar chuan, "Police an ṭha a, chutihrualin kan penalty chawi dan erawh pawm a har. A bik takin a vawi hnihna kha chu a mak ka ti," tiin Vanglaini a hrilh.
Police an ṭha
Mizoram Police-in tawnhriat player nei ṭha rual an la kawl a, Shillong Lajong aṭanga an lakluh centre back K. Lalfakzuala pawh a rintlak hle.
Police-in bench-ah player ṭha an la nei a, MPL-a tawnhriat nei F. Lalnuntluanga (Tluangtea) leh F. Lallawmkima te bench aṭangin an luhtir thei bawk. Lalbiaksanga Colney chuan, "Match khatna hi chu a har ṭhin, kan result-ah kan lawm," tiin Vanglaini a hrilh.