Premier League Thlirlawkna: Arsenal an thutak dawn, an ti mai mai lo!

Arsene Wenger hoin team ropui an din a, tuma tih ve theih ngai loh 'The Invincibles' an din, team hmunawm an din a ni satliah lo a, an khelmual lian vak lo Highbury Stadium chu tunlai stadium ṭha leh changkang Emirates Stadium-in an thlak thei.

Mahse, thil engkim tan hun ruat a ni, tih ang kha a ni. Wenger leh Arsenal pawh an vanglai a ni reng thei bik lo a, an inṭhen dawn hnaiah phei chuan Premier League champion aiin palina nih phak ngawr ngawr chu an thil tum a ni ṭhin.

Wenger-a'n sulhnu hriatreng tawh tur a kalsan a, amah thlaktu Unai Emery hoin hna an thawk rei lo. Team enkawl lama sulhnu nei ropui hran bik lo, mahse theihna nei si Mikel Arteta hnuaiah 'Project' lian tak an kalpui.

Arteta-a'n a hun hmasa lama FA Cup a lak nghal kha chu a team din tia sawi theih a ni lo ang. Season hmasa erawh kha chuan ama team din hmangin Manchester City an el phak, kuminah Pep Guardiola hote chunga awm an tum dawn.

Thluak bur

Team din tur hian hnathawh tur tam tak a awm, dawhtheih taka nghah a ngaih chang a awm a, club thuneitu lamin an rin ngam leh rin tlak khawpa hnathawh a ngai bawk - tunah chuan Arsenal neitute lamin Mikel Arteta chungah rinna pumhlum an nghat tih a lang.

Gunners manager hian North London team enkawl hna a thawh ṭan khan, player hlawh hnem si mah se ṭangkai tam lo thawn chhuahna a zawng nasa, tam tak chuan senior player an chhuahtir nasat avangin an ring ngam lo hial.

Khelmual chhunga result ṭha nei tur chuan a pawn lam boruak a ṭhat a ngai tih a hrechiang, player langsar leh hlawh hnem te pawh a hlawh tlemte nen angkhat vekin a hrual. Captain Pierre-Emerick Aubameyang pawh a zuah chuang lo a nih kha, thuawih a ngaipawimawh.

Arteta chuan, "Club chhunga awm zawng zawngte hi chuan an mawhphurhna zawnah ṭheuh theihtawp chhuah se ka duh a, club a ṭhanlen zel theih nan mawhphurhna la ngam bawk turin ka duh," tiin a lo sawi tawh ṭhin a ni.

Arteta chauh a ni lo, a phenah mi pawimawh tak pakhat a awm - a hming chu Edu a ni. Arsenal hian tun hma lama an neih ngai loh 'Technical Director' chu 2019 July 9 khan an nei thar, player a nih laia an chhawr ṭangkai hian club inrelbawlna lamah pawh a thawhhlawk ta hle.

Player hralh leh lei chungchangah Arteta leh Edu te an inkawp fuh êm êm a, team tichak thei tur leh paih chhuah ngai an hrechiang. Hun rei lote chhunga an hnathawh avangin season tharah Gunners hian beisei an nei sang dawn.

Rintlak player

Player ṭha awmkhawm pawhin hruaitu an mamawh ṭhin, coach Mikel Arteta-a'n Real Madrid aṭanga a lak Martin Odegaard chungah rinna a nghat a, captain nghet atan a ruat, ani hi kum naupang tak a nih lai aṭanga khawvel hriat hlawh tawh kha a ni.

Spanish club tan beisei angin khel ta chiah lo mah se Arsenal lamah a theihna a pholang mek, an ram Norway tana captain dinhmun chelh thei a ni bawk - kum 24 mi chauh la ni mah se khelmual chhungah a puitling tawh, season tharah a puitlin lehzual a rinawm.

Norway international midfielder hian season hmasa khan Premier League goal 15 a khung, midfielder khung atan chuan a tlem lo - penalty pettu a la ni lo mah mah. Chutihrualin ṭhat tawk lohna lai erawh a nei ve tho, tharum neih belh tura a beih erawh a ngai ang.

Player ṭhenkhat hliam vanga buai an awm ṭhin a, harsatna vanga inkhel thei lo an awm fo bawk - season a rei avangin inkhel tam thei an pawimawh; chutiang player kan zawng a nih chuan Bukayo Saka hi a chhanna a ni.

Season hmasa khan Saka hian EPL match 38 a khel kim vek! England international forward hi mual sir lama Arsenal hmanraw hlauhawm bera chhal ngam a ni a, kum 21 mi chauh a la nih avang erawh chuan season tawp lam brouak sang hmachhawn dan a thiam a ngai.

Goal khung leh assist nei thei viau mah se Saka hian season hmasa khan hun pawimawh laiah penalty a hlah, player pawimawh leh chhawr rim bikten tihsual an neih hian midang tihsual aiin a langsar a, a nghawng a na ṭhin - vawi khat pet sual pawizia a hre tawhin a rinawm.