Captain hual Declan Rice

Arsenal tuneitu lamin Mikel Arteta chunga rinna an nghah ngamzia lanna tur pawisa an pek dan hian a tichiang, player pakhat lei nan pound maktaduai 105 tehmeuh an pe ngam hi tun hma lama an bazar dan chhut chuan a mak.

Chutihrualin, coach Arteta-a'n a player duh tak Declan Rice hi West Ham captain ni lai a ni a, season hmasa khan Hammers hi Europa Conference League-ah a champion pui a, a theihna leh thiamna bakah khelmual chhungah hruaitu ṭha a ni.

England international midfielder hi tunah chuan Arsenal mamawh tak tia sawi theih a ni, inelna boruak sangah chiai lo tura ngaih a nihna hi North London lamin an duhzual chhan ni pawhin a lang - English player man tam ber ni turin an ngam hial a ni.

Season hmasa tawp dawn khan, league match khelh hmabak pakua chauh awm tawhah Gunners hi Manchester City aiin point riatin an sang zawk, mahse Liverpool leh West Ham lamah goal hnih an neih sa an hum thei lo a, an zuih chhunzawm ta bawk.

A tawp lam an khar danah Arsenal ṭantute rilru a na, an rilru nat chhan chu season tluan deuhthawa hmahruaitu ni chung sia an champion lo kha a ni. Rice hi Man City pawhin an duh a ni a, player inchuhnaah chuan Gunners an chak phawt, inkhelhah chak chhunzawm tak ang maw!

Season hmasa khan Rice hi ball inchuhah vawi 334 chu a chak zawkah a ṭang - Premier League player zingah a chungnung ber, an khingpui te ball kaltluang lo chhutchah vawi 63 a nei bawk, ball ken thui lamah pawh Lewis Dunk, Rodri leh Jack Grealish te chauh tluk loh a nei hial.

Arsenal hian Thomas Partey leh Jorginho te an la nei bawk a, midfield lailum luah tur chu an nei ṭha dawn ta hle. A theihna leh khelh dan tur chhut chuan Rice hian hmun pawimawh a chang dawn, chutihrualin inthlahdah thei lo turin elpui a nei dawn tihna a ni.