A hnungah Timber

Declan Rice leh Kai Havertz te hming a rik rin avangin Jurrien Timber thawm hi a na lo deuh a ni mai thei. Ajax defender hi pound maktaduai 30 man a tling a, a theihna leh man zat chhut chuan bench lamah ṭhu satliah tur chi niin a lang lo.

Netherlands international hi tlarhnung laiah a khel thei, season hmasa lama a hun hmanna pawh a ni. Mahse, tun hma chuan Ajax leh Dutch team tan a sirah a khel ṭhin, hei hi Mikel Arteta-a'n a chhawrna tur hmun pawh a niin a rinawm.

Kum 22 mi Timber hi Ben White leh Takehiro Tomiyasu te tan elpui hautak a ni thei dawn, goal venhim bakah a nawr leh ball cross thiam tel an ṭangkai zual ṭhin, chuvangin tlarhnung sirah inelna hautak a awm dawn tihna a ni.

Spanish manager Arteta-a'n Pep Guardiola hnen aṭanga a zirchhuah pakhat chu 'inverted full-back' a ni; hemi kawngah hian Oleksandr Zinchenko chu chhawr rim leh hman ṭangkai a ni ṭhin - Ukraine international hian a hna pawh a tlin.

Mahse, Zinchenko hi a hliam ve fo, goal venhim bakah midfield laia tlan luh tam a, ball sem leh tlarhma lama tlan luh hi player nazawng tana tih harsa a ni. Zinchenko bakah Timber hi ti thei tura beisei a ni ve bawk.