Xhaka aiah Havertz

Kai Havertz hian Chelsea tana hun a hman lai khan, an lei chhan leh beisei ang takin a khel chhuak loa ngaih a ni. Bayer Leverkusen tana a hriamna ang kha Blues tan a hlen chhuak lo niin a lang, an hralh phal chhan ni pawhin a rinawm.

Germany international hi midfielder a ni a, forward atan chhawr a ni ṭhin bawk. Mikel Arteta-a'n an lakluh tirh khan an midfield tichak thei tur a nih thu a sawi a, an player chhuak ta Granit Xhaka hmun ruak luah thei tur a ni ang.

Blues tan beisei a phak lo a ni mai thei, chutihrualin 2021 Champions League final-a Manchester City an hnehna goal awmchhun khungtu a ni miau a, inelna sang leh lianah tawnhriat a nei, hei hi UCL khel tur Arsenal tana ṭangkai tura ngaih a ni.

Kum 24 mi hi a ṭul hunah chuan tlarhma lai leh a sirah pawh a chhawr theih. Bukayo Saka, Gabriel Jesus, Gabriel Martinelli, Eddie Nketiah, Leandro Trossard leh Reiss Nelson te chu a elpui ni thei vek an ni dawn.

Season hmasa khan Havertz hian Chelsea tan inelna hrang hrangah goal kua a khung a, ani aia khung tam an awm lo - assist erawh vawi khat chauh a nei. Gunners player 12 zetin assist vawi khat aia tam an nei, pound maktaduai 65 man ni mah se khel phak turin a beih a ngai dawn tihna a ni.

Goal khung lamah pawh Martin Odegaard, Martinelli, Saka leh Jesus ten goal 10 chuang an khung vek - Havertz tan elpui tur an tam, chutihrualin theihna nei leh hmasawn zel rual chauh a la nih avangin a tan chona nuam tak a ni thei bawk.