City treble kha kan tan a na - Shaw

Manchester United defender Luke Shaw chuan an hmelma kumhlun Manchester City-in treble nomawi an chawi chu an tan thil hmuh hrehawm tak a nih thu a sawi a, a thlen nawn tawh loh a beisei thu a sawi bawk.

Red Devils hian kum 1999 khan treble nomawi an lo chawi tawh a, English club zingah ti ve thei dang an awm loh reng hnuin City chuan season hmasa kha an rawn ti 've' - hei tak hi United lamin a na an ti.

United hliama chi phul belhtu pakhat chu FA Cup a ni. Red Devils hian City nen FA Cup final an khel a, City 'treble' na kawng dal theitu an ni. Mahse, 2-1 in an tlawm a, a karlehah Champions League final-a Inter Milan (1-0) hnehin City an champion zui.

Shaw chuan, "A nihna takah chuan a na takzet a ni," a ti a, Pep Guardiola squad-ah hian England international player Jack Grealish, Phil Foden, Kyle Walker, John Stones leh Kalvin Phillips te awmin, an hlawhtlin hnu lawkah England camp an zawm zui.

United defender Shaw chuan, "United player-ten hrehawm kan ti vek a, a bik takin kei chuan England camp-a anni ho lo hmuhte kha hrehawm ka ti hle. Tawrh thiam a har a, a thlen nawn a rem tawh lo," a ti a, City hlawhtlinnain a tihchauh thu a sawi.

Shaw chuan theihtawp chhuah a ṭul thu sawiin, "Tunah chuan theihtawp chhuah a, awlsam taka kan champion tir tawh loh a ṭul ang. Kan hun tawn kha thlir kir ila, awlsam taka champion tir kan ang tlat a ni.

"Player kan nihna angin khatiang thil kha chu kan pawmzam a remchang tawh lo ang," a ti a, City kawng dal a tum hle - mahse, United tan City ringawt hi an kawng dal theitu an ni lo, tih hriat a ṭha.

Season hmasaa beisei phak lo Liverpool an inthuam ṭha mek a, coach thar Mauricio Pochettino kaihhruaina hnuaia indinthar tumin Chelsea-in inṭhuahfai hna an thawk mek a, Arsenal hian player langsar pathum lakluh nan pound maktaduai 200 chuang an seng tawh a, Tottenham Hotspur leh Newcastle United an la awm cheu bawk.

United hian USA-ah pre-season tour nei zoin, August 5 hian pre-season match an khel leh dawn a, Ligue 1 club RC Lens nen an intawng ang. Hemi zawh hian Ireland lamah Athletic Bilbao nen an inkhel leh dawn bawk a ni.