Liverpool captain thar Virgil van Dijk

Jordan Henderson-a'n sum tamna Saudi lam a pansan hnuah Liverpool pawhin captain thar an nei ve leh ta a, captain thar hi tu dang ni loin Virgil van Dijk a ni.

Kum 32 mi VVD hi an ram team Netherlands-ah pawh captain dinhmun chelhin, Reds-ah pawh hian Hendo awm loha armband hrengtu ber a ni a, mawhphurhna lian zawk chelh vanga talbuai tur chi a ni lo - tawnhriat a nei ṭha tawk.

Dutch defender chuan, "Ka tan chauh a ni lo, ka chhungte, ka nupui leh ka fate tan pawh thil ropui bik a ni a, tun dinhmunah chuan ka lawmna hi ka sawifiah thiam lo. Mahse, he dinhmun ka chelh thei hi ka inchhuang hle a ni," a ti.

Liverpool tana vawi 222 inlan tawh VVD chuan sawi zawmin, "Captain armband hlan ka ni hi ka inchhuang a, ka chungah leh he club chunga fan-te an lawm theih nan ka theihna zawng zawng ka hlan ang," a ti a, Liverpool tana nomawi tam zawk chawi a tum.

VVD hian January 2018 khan a hun laia defender man to ber ni turin Anfield hi Southampton aṭangin a zawm a, Premier League, Champions League, FA Cup, Carabao Cup, UEFA Super Cup, FIFA Club World Cup leh FA Community Shield-ah champion nomawi a chawi tawh.

Netherlands tan vawi 58 inlana goal ruk khung tawh VVD hian Liverpool a pan hnuah mimal chawimawina pawh a dawng hnem tawh hle. UEFA Men's Player of the Year, PFA Players' Player of the Year leh Premier League Player of the Season-ah te thlan a ni tawh a, FIFA FIFPRO World 11, UEFA Team of the Year leh PFA Team of the Year-ah te ṭum thum ṭheuh a lang tawh bawk.

Reds hian captain ropui tak tak lo nei tawh ṭhinin, Steven Gerrard leh Jordan Henderson chu tun hnaia captain niin an ropuina leh hlawhtlinna inhrilh nawn a ngai lo - VVD tan an hmun ruak luah khat turin theihtawp chhuah a ngai dawn.

Hetihlai hian Liverpool hian vice captain thar an nei bawk a, Brighton & Hove Albion zawma chhuak ta James Milner hmun ruakah Trent Alexander-Arnold a awm ang.

Arnold hian Reds tan Premier League, Champions League, FA Cup, Carabao Cup, UEFA Super Cup, FIFA Club World Cup leh FA Community Shield-ah nomawi a chawi tawh a, PFA Team of the Year-ah vawi thum lang tawhin, PFA Young Player of the Year leh Premier League Young Player of the Season-ah thlan a ni tawh a, FIFA FIFPro World11-ah kum 2020 khan a lang bawk.

Liverpool chhul chhuak niin, club dang tan a la khel ngai lo a, England tan kum naupangtê ni chungin match 20 zet a khel tawh bawk. Trent hian Reds tan match 273 ngawt a khel tawh a, goal 16 leh assist 72 a nei thei - defender hnathawh atan chuan a ropui hle.