Chelsea-in Brighton keeper an duh

Premier League club Chelsea an inthuamṭha mek zel a, thuthar berah chuan London club hian Brighton & Hove Albion keeper Robert Sanchez chu lakluh tumin an dawr.

Sanchez hian March thla vel khan Brighton-a a number 1 dinhmun chu Jason Steele lakah a chân a, Brighton hian USA-a an pre-season tour-ah pawh Sanchez hi an hruai ve lo.

Brighton hian goalkeeper Bart Verbruggen chu Anderlecht aṭanga euro maktaduai 19-a an lakluh tawh bawk avangin Sanchez hi chhuahtir an pawi ti lo ang, tih a chiang a, chutihrual chuan he thu buatsaih a nih lai hian Blues dawrna hi an la chhang rih lo a ni.

Chelsea hian an keeper Edouard Mendy chu Al Ahli hnenah an hralh a, hei vang hian Spanish keeper Kepa Arrizabalaga elpui tur an mamawh - Sanchez hi Spanish tho niin, ram tan match hnih a khel ve tawh.

Season hman zawh takah khan Sanchez hian Premier League match 23 a khel a, March thla khan English keeper Steele chuan nek chhuakin, coach Robert De Zerbi chuan Steele chuan a khelh dan phung a man thiam zawka a hriat thu a sawi a ni.

Sanchez hian Brighton-ah kum hnih cham turin contract a la nei a, English club hian chhuahtir duh mah se man tlawm taka chhuahtir ngawt erawh an phal kher lo mai thei.