Palace-in Franca an la dawn

Premier League club Crystal Palace chuan Brazil Under-20 international midfielder Matheus Franca chu Flamengo aṭangin an la lut dawn a, a man atan pound maktaduai 26 an seng ang - he thuziak i chhiar meuh chuan an inla lut fel tawh hial mai thei.

Kum 19 mi midfielder hi Palace chuan rei tak an lo enthla tawh nia sawi a ni a, season kal mekah Flamengo tana match 29 khel tawhin goal thum a khung - a kum a la naupan avangin hmabak a nei êng hle.

Palace hian Galata-saray lakah an player chhuanvawr Wilfried Zaha chu an chân a, a hmun ruak luah turin kum 19 mi Franca lam hi an hawi ta a ni. Franca hian attacking midfielder angin a hun tam zawk a hmang a, kum 2021 aṭang khan Brazilian club tan hian inlanin match 54 a khelhsak tawh.

Franca hian Flamengo chu Brazilian Serie A lamah pahnihna a nihpui mek a, mahse, hmahruaitu Botafogo an phak lohna chu match 17 khelh tawhah point 12 a ni mek.

Roy Hodgson hoa season hmachhawn tur Palace hian Colombia midfielder Jefferson Lerma chu Bournemouth aṭangin free transfer-in an la tawh bawk a, Franca hi nipui transfer-a an player pahnihna tur chauh a ni.