Netherlands-in goal an surtir

Hmeichhe World Cup khelh mekah Netherlands-in last 16 lut turin harsatna an tawk lo a, nimin khan Vietnam chu 7-0 ngawta sawp chungin knockout round an lut chiang hle.

Netherlands tan hian Esmee Brugts leh Jill Roord te chuan goal hnih ve ve an khung a, Lieke Martens, Katja Snoeijs leh Danielle van de Donk ten goal khat ṭheuh an khung bawk - a vawi khat nana hmeichhe World Cup khel Vietnam tan an ṭha lutuk hret.

Group E inkhel dangah hmeichhe World Cup-a champion ngun ber USA an chak zo lo a, Portugal nen 0-0 in an inhnehtawk - Portugal tan Ana Capeta chuan hun pek belhah post a pet per a, USA nulate an thin phu a rang hman khawpin a rinawm.

A tawpah erawh 0-0 in inkhel a tawp a, point nga hmutu USA-in group E-a pahnihna ni chungin last 16 an lut - USA hian an match hmasa berah 3-0 a Vietnam an hneh tih loh chu chak an la nei lo a, Netherlands nen 1-1 in an lo inhnehtawk tawh bawk.

Champion nomawi an kawl lai humhim an duh chuan USA tan insiamṭhat a ṭul. Round of 16-ah group G hmahruaitu an hmachhawn dawn a, Sweden emaw Italy emaw an hmachhawn dawn tihna a ni - Sweden hmachhawnna chance a sang zawk.

Netherlands chuan round of 16-ah hian group G pahnihna an tawng ve leh thung ang.