Semifinal lut tur Aizawl FC?

Vawiin chawhnu dar 1:30 hian GIG Motors I Day Football 2023-ah Aizawl FC-in Electric Veng FC an hmachhawn dawn a, I League club hi an chak a nih chuan semifinal an lut dawn.

Inkhel hmasa result aṭanga thlir chuan coach Victor Lalbiakmawia enkawl AFC tan harsa tur awmin a lang lo a, mahse result hian engkim a sawifiah lo thung. Electric Veng hian match hmasa berah FC Venghnuai 3-1 in hneh lo mah se khel ṭha zawk an ni.

Electric Veng hi coach Lalsangzuala Hmar academy Aizawl South Football Academy nen an inthlunzawm a, khelh dan nghet ṭha tak an nei. Chutihrualin match hmasa berah erawh an kum naupanna a lang a, tawnhriat neih tlem vangin point an hloh.

Hriat tel atana ṭha erawh Mizoram senior team kawr ha tawh striker C. Lalhriatpuia an kawl a, MPL U18 best midfielder ni tawh Alan Lallawmsiama a awm bawk. Theihna nei sang player pahnih hi FC Venghnuai lakah bench aṭangin an lut a, Aizawl FC lakah bul an ṭan a rinawm.

Chutihrualin Electric Veng tan Aizawl FC hneh a harsa dawn. I League club hian kil tinah player ṭha an kawl a, tlarhmaa siksawi thei tur player an kawl. Mual sir aṭanga nawr tur pawhin R. Lalthanmawia (Amawia), R. Ramdin-thara (Tharpuia), Augustine Lalrochana leh Lalbiakdika (BD-a) te an awm a, hman an châkawm vek ang. Match hmasa bera goal hnih khung a, goal hnih danga inrawlh Lalrinzuala'n a club thar tan goal khung chhunzawm a tum ang.