PSG pan tur Ousmane Dembele

Barcelona forward Ousmane Dembele chuan Paris Saint Germain a zawm dawn, a chhuah tur thu hi Barca coach Xavi chuan thuthang satliah ni loin a dik tih a sawi chiang tawh a ni.

USA-ah Barcelona hian season thar inbuatsaihna an nei, a tir lamah chuan Dembele hi a inkhel. Mahse, a chhuah duh thu a sawi chian tak avangin nimin zinga AC Milan nen an inkhelah chuan an telh tawh lo.

Kum 26 mi Dembele hian 2017 khan Borussia Dortmund aṭangin Barcelona hi a zawm, pound maktaduai 135 man zet a ni. Beisei nei sang viau mah se hliam a nei ngun êm êm a, an beisei ang a phak ta lo a ni.

Catalan club tan hian kum ruk chhung hun a hmang a, hetih chhung hian inelna hrang hrangah match 185 khelin goal 40 a khungsak - tunah chuan Paris club tan chona thar a hmachhawn dawn ta zawk.

Xavi chuan, "Paris Saint Germain aṭangin sawmna a dawng a, keini tan chuan tih theih a awm lo. Duhthlanna chu ama siam tur a ni a, a thutlukna pawh chiang takin min hrilh tawh," tiin a sawi.

Hliam nei loa a khel thei a nih phawt chuan Dembele hian theihna a nei sang, season hmasa mai pawh khan coach Xavi kaihhruaina hnuaiah hmun pawimawh a chang phak, kum hnih daih contract ziak mah se PSG sawmna a hnar zo lo.

Pawi a tih thu sawiin Xavi chuan, "Ka tan chuan a pawiin a na bawk, a chhan chu kan theih leh thiam ang tawka ṭhain kan enkawl a, amah pawh a hlim hlein ka hria, danglamna siamtu a nih zel kha kan beisei dan chu a ni.

"Mahse, a chhuah tur thu min hrilh, chuvangin AC Milan pawh a hmachhawn ve lo a ni," tiin a sawi. Milan lakah hian Ansu Fati chuan goal awmchhun a khung a, 1-0 in Italian club ṭha hi an hneh.

PSG leh Dembele te mimal thilah an inrem tawh a, Ligue 1 champion hian France international la chhuak tur hian Barcelona hnenah euro maktaduai 50 an pe dawn a ni.