Mane-a'n Ronaldo awmna Al Nassr a pan

Sadio Mane chuan Bayern Munich a chhuahsan fel a, season thar aṭang chuan Al-Nassr tan a khel ang. Saudi Arabian club tan hian kum li daih contract a ziak a, kar khatah £650,000 tehmeuh a hlawh ang.

Kum 31 mi Mane hi Cristiano Ronaldo nen an khel dun dawn tihna a ni a, tun nipui bazar chhungin Al Nassr hian Seko Fofana, Marcelo Brozovic leh Alex Telles te an la lut tawh bawk, season hmasa ai chuan nasa takin an ṭha dawn tih a rin ngam.

Senegal international Mane chuan, "Al Nassr chhungkaw zinga ka tel ve thei hi ka lawm a, a taka inhmuh hlan ka nghakhlel tawh hle," tiin an tlangzarhna video-ah a sawi a, tun kar chhungin training a zawm pangngai hman a rinawm.

Mane hian season hmasa nipui lai khan Liverpool chhuahsanin Bayern Munich hi a zawm. German club tan hian inelna hrang hrangah match 38 khelin goal 12 a khungsak - Bundesliga nomawi a chawipui a ni.

League champion ni mah se beisei angin an hlawhtling tawk lo, a bik takin Mane-a'n an lakluh laia an beisei a phak lo. Champions League-a an chak loh ṭumin a teammate Leroy Sane nen intibuaiin a hnek zui bawk.

Bayern Munich nen hian a hnu lamah an boruak a ṭhat thu sawi mah se a ṭha tak tak thei lo. Bayern CEO Jan-Christian Dreesen chuan, "A tan kum harsa a ni, amah ngei pawhin beisei a phak lo tih a pawm," tiin a sawi.

Bayern manager Thomas Tuchel pawhin Mane-a'n Al-Nassr a zawm chu thil ṭha a nih thu a sawi, an duh leh tum ang veka thil a thlen vek bik loh thu leh hun kal zel atana an ṭhat tlan zawkna tur a nih thu a lo sawi tawh bawk a ni.

Mane hian a vanglai a sawi a nih chuan Liverpool tana a khelh lai kha a sawi ve ṭhin ngei ang. Jurgen Klopp-a'n tlarhma lamah Mane, Mohamed Salah leh Roberto Firmino te a inkawptir ṭhin.

Anni pathum hian Premier League leh Champions League nomawi an chawi a, England-ah chauh ni loin khawvel huap pawhin hmatawng inkawp fuh bikte zinga mi an ni phak hial.

Kum 30 hnua Reds-in EPL nomawi an chawi theih nan khan Mane hian a thawhhlawk hle, hripui leng kara inelna an neih ṭum kum 2019-2020 season khan goal 18 khungin a team a champion pui a ni.

Tunah chuan hun a inher hret a - Firmino leh Mane chu Saudi Arabian League lamah an awm dawn, an kawppui ṭhin Salah erawh Liverpool tan a la khel chhunzawm dawn, season tharah pawh rinrawl a la ni chhunzawm ang.

Saudi League lamah player langsar kal an tam ta hle. Ballon d'Or kawl mektu Karim Benzema leh N'Golo Kante te chuan Al Ittihad an zawm a; Manchester City aṭangin Riyad Mahrez pawhin kar hmasa khan Al Ahli a pan.

Steven Gerrard pawhin Al-Ettifaq a enkawl dawn, ani hian Liverpool captain Jordan Henderson chu a kaihhruai turin a seng lut fel tawh bawk.